Monna yo a thomilego kgwebo ya gagwe ka grant ya R350 o thwetše batho ba 8
Ka Mogale Mohale
Ka lebaka la bohlaki, Gift Diabakoane o ile a gapeletšega go tla ka leano mme a tšeya diphetho tše boima gore a phele.
Lesogana le la mengwaga ye 24 go tšwa Praktiseer ka ntle ga Burgersfort, Limpopo o ile a thoma go boloka tšhelete ya gagwe ya mphiwafela wa kimollo ya R350 tekano ya mengwaga ye 2 gore a kgone go thoma khamphane ya didirišwa tša go hlwewkiša yeo a e bitšago Kgopotso Projects and Supplies.
Tšeo a di tšweletšago ke sesepe sa go hlatswa dibjana, sa go hlwekiša fase, sa go hlwatswa difatanaga gammogo le didirišwa tša go iphumula ntlwaneng ya boithomelo.
O re o tšere sephetho sa go boloka tšhelete ya mphiwafela gore a kgone go thakgola kgwebo ya gagwe mme a tle a kgone go hlola mešomo.
O re o kopane le dihlotlo tše mmalwa efela o ile a kgotlelela gore a godiše kgwebo ya gagwe.
“Le ge e le gore ke kopane le mathata a ditšhelete, ke ikemišeditše go tšwela pele ka gore toro yaka ke go dira kgwebo yeo e tšwelelago, yeo e bulelago bao ba hlokago mešomo menyako,” a realo.
Nepo ya gagwe ke go tšweletša didirišwa tša go hlwekiša tša maleba le go matlafatša borakgwebo gammogo le go hlolela baswa mešomo.
“Ke ikemišeditše go hlohleletša baswa go fihlelela ditoro tša bona tša go tsenela tša kgwebo. Ke dumela gore bontši bja baswa ba ka holega le go ithuta ka maitemogelo a ka, mme ba fetola megopolo ya bona go dikgwebo tšeo di tšwelelago,” a realo.
Gift o re o sepediša kgwebo ya gagwe ntle le go hwetša thekgo go ba babeeletši. “Toro ya ke go aga kgwebo yeo e tla thušago baswa,” a realo.
O re nepo ya gagwe ke go hlohleletša baswa gore ba tšeye taolo ya maphelo a bona mme ba iterele menyetla.
“Ke dumela gore tša kgwebo ke tharollo ya hlaelelo ya hlokego ya mešomo le sesefalo ya menyetla Afrika Borwa gomme ke nyaka go bontšha baswa gore go a kgonega go thoma kgwebo ntle le babeeletši,” a realo.
O re o ile go abela dikolo tša bagolofai go la Burgersfort ka kgwedi ya Phupu didirišwa tša gagwe ka nepo ya go šomela setšhaba.
O thwetše bašomi ba seswai khamphaneng ya gagwe. Thakgatso Kobe (19) o re o hwetša maitemogelo ao a hlokago. “Go šomela Gift go nthošitše go godiša boitshepo bjaka mme ke hweditše monyetla wa go gola kgwebong,” a realo.
Salome Lewele (35) o rile: ”Gift o thekga tšwelopele yaka mme ke boni kgolo ya tekatekano yeo e makatšago go mošomo waka.”
