Masepala wa Greater Tzaneen o thubile malapa ao a agilwego nageng ye e beetšwego go aga toropokgolo

Badudi ba befetšwe morago ga gore malapa a bona thubiwe.

Se se tla ka morago ga gore masepala wa Greater Tzaneen o thube malapa ao a fetago 160 kua Dan Extension 2 ka morago ga taelo ya Kgorotsheko ya godimo ya Limpopo.

Ka Mošupologo, 15 Lewedi masepala mmogo le moemedi wa molao wa kgoro ba thubile malapa a 65, mabala a go ageletšwa a 58 gammogo le mekhukhu ye 37 nageng ya Erf 1018 le karolo ya 25 le 28 ya polase go la Mohlaba 567LT.

Tiragalo ye e latela ntwa ya molao yeo e thomilego ka 2022. Ka kgwedi ya Manthole, masepala o ile wa hwetša taelo go emiša bao ba šušumelago lefelong le, efela taelo yeo ya ganetšwa ke moemedi wa setšhaba, Mogale Joseph Mokgoloboto.

Taelo ya mafelelo e ile ya fiwa ka kgwedi ya Phupu 2025.  Mmoleledi wa masepala, Neville Ndlala o re Mokgoloboto o ile a leka go thibela tshepedišo yeo ka di 20 Phato, letšatši pele ga go thubiwa ga malapa.

“Eupša thibelo yeo e ile ya ganwa ke kgorotsheko ka ditšenyagalelo ka di 29 Phato, gomme seo sa bula tsela ya gore masepala a tšwele pele,” a realo.

Ndlala o re go bile le dikgalemo tše dintši go setšhaba gore ba se šušumele nageng yeo, efela badudi ba ile ba tšwela pele ka go aga.

“Masepala o lla le badudi bao ba amegilego, eupša re gatelela gore lefelo leo le beilwe ka thoko go tšweletšo ya toropokgolo yeo e šetšego e amogetšwe ke barulaganyi ba masepala,” a realo.

O re ge ba sa šome kgahlanong le go šušumela mafelong a masepala, ba ba kotsing ya go gola ga mafelo ka ntle ga taolo, go šitišwa ga ditirelo gammogo le go rekišwa ga mafelo ka bofora.

“Ga se lekga la mathomo masepala o šoma mo lefelong le. Ka Hlakola 2024, malapa a mmalwa gammogo le moago wo mogolo wa ditena di ile tša thubiwa ka taelo, eupša batho ba ile ba boela ba tšwela pele ka go aga,” a realo.

O re badudi ba kgopelwa go netefatša mong wa lefelo le masepala pele ga go reka, gore ba se ke ba ba batšwasehlabelo.