Mofaladi o ahloletšwe kgolegong ka morago ga go hwetšwa a swere dithuthupi mollwaneng wa Beitbridge

Kgorotsheko  ya Musina e ahlotše mofaladi wa gotšwa nageng ya Zimbabwe, Fore Brighton (33) mengwaga ye 15 kgolegelong ka morago ga go hwetšwa a swere dithuthupi tšeo di se go molaong.

Se se latela morago ga diphuruphutšo tšeo di be go di dirwa ke maphodisa mollwaneng wa Beitbridge, Musina ka la 29 Pherekgong 2024 nakong ya ge ba tlo phuruphutša pese yeo e be go etšwa Zimbabwe go tla Afrika Borwa.

Nakong yeo, maphodisa a hweditše mokotla woo o bego o na le dilo tšeo di bego di belaelwa go ba dithuthupi.

Dihlopha tša ditsebi tša dithuthupi le ba lefapha la dintlha tša bosenyi di ile tša bitšwa lefelong la tiragalo.

Setsebi sa dithuthupi se ile sa netefatša gore dilo tše di hweditšwego e be e le dithuthupi tše 94 le difuse tše 100.

Mmoleledi wa Hawks Limpopo, Warrant Officer Lethunya Mmuroa o re Brighton o ile a swarwa molatong wa go swara dithuthupi tšeo di sa dumelelwago gomme a tswalelelwa setišing sa maphodisa sa Musina.

“Sengwalwa sa gagwe sa melato se ile sa fetešetšwa go sehlopha sa bosenyi sa Hawks go dira dinyakišišo tše di tseneletšego,” a realo.

Mmuroa o re Brighton o lekile makga a mantši go hwetša beile, eupša a palelwa. “O dutše ka kgolegong go fihla a ahlolwa ka Labobedi, 22 Mosegamanye,” a realo.

Hlogo ya Hawks Limpopo, Major-General  Gopz Govender o amogetše kahlolo ye gomme a reta sehlopha sa dinyakišišo.

“Kahlolo ye e romela molaetša o tiilego go bohle ba ba naganago go tsenya letsogo ditirong tša bosenyi bjo bjalo. Re tla ba swara, ra ba ahlola, gomme ba hwetša kotlo ya nako ye telele,” gwa realo Govender.