MORUTWANA YO A LATOFATŠWAGO KA GO TŠHELA MOITHUTI-MMOGO KA MEETSE A GO BELA O O LOKOLOTŠWE KA BEILI  

Moithuti wa mosetsana yo go thwego o tšhetše moithuti yo mongwe ka meetse a go bela o filwe beile ya R500.

Moithuti yo, Ofentse Selepe (20) o swerwe ka labohlano la 1st Nofempere 2025 ka lebaka la go tšhela thaka meetse a go fiša sekolong sa sekondari sa Kgagatlou motseng wa Seleteng, Limpopo.

Ofentse o tšweletše pele ga kgorotsheko ya bomaseterata ya Thabamoopo ka Lebowakgomo ka Mošupologo wa di 3rd Nofemere 2025 moo ramolao wa gagwe a ilego a tsentšha kgopelo ya kgorotsheko ya ka pela kgorongkgolo ya tsheko ya Polokwane gore a lokollwe ka peile e le gore a tsepeletše ditlhahlobong tša gagwe tša mphato wa marematlou.

Go ya ka mmoleledi wa maphodisa Colonel Malesela Ledwaba, tlhaselo ye e diregile ka iri ya mathomo ya di 26 Diphalane ka nako ye e ka bago ka 04:30 mola baithuti ba Mphato wa 12 ka bobedi ba be ba tsenela kampa ya go lokišetša ditlhahlobo sekolong seo.

“Dinyakišišo tša mathomo di laetša gore moithuti wa lesogana o be a robetše ka gare ga ye nngwe ya diphapoši tša borutelo ge go thwe mogononelwa o ile a mo batamela gomme a mo latofatša ka go kgoma ditho tša gagwe tša ka thoko,” Ledwaba o boletše.  “Go begwa gore mohlaselwa o ile a latola ditatofatšo tšeo.”

Dipego tša maphodisa di utolla gore moithuti wa mosadi mathomong o ile a tšwa ka phapošing ya borutelo eupša a boa ka meetse a go bela, ao ka morago a ilego a a tšhela godimo ga mohlaselwa yo a robetšego.

Mogononelwa o swerwe ka Labohlano, la 31 Diphalane, go ya ka bohlatse bjo bo kgobokeditšwego nakong ya dinyakišišo tšeo di tšwelago pele.

Motšwasehlabelo Kganya Matabane (19) o amogetšwe bookelong gomme o amuša dikgobalo tše šoro tša go fišwa go tšwa masetlapelong a. 

Molato wo o tla boela kgorong ya tsheko ka la 5 Desemere 2025.