Banna ba bane ba golegilwe molatong wa polao ya DJ Sumbody  

Maphodisa a golegile banna ba bane mathapameng a Mošupologo mabapi le polao ya DJ ya go tuma Oupa John Sefoka, yo a tsebegago kudu ka leina la DJ Sumbody.

 

Sefoka o bolailwe ka go thuntšhiwa  kua Woodmead ka November 2022. Monna o a bego a sepela le yena o bolailwe tiragalong yeo. 

 

Mmoleledi wa maphodisa Brigadier Athlenda Mathe o boletše gore banyakišiši ba bosenyi bao ba rulagantšwego ba Gauteng ba šomile molatong wo gomme ka morago ba thapola sehlopha sa mošomo sa maphodisa sa dipolao tša dipolotiki go thuša.

 

Go dumelwa gore ba bararo ba bagononelwa ke babolai bao ba thwetšwego gomme go dumelwa gore o tee o laetše polao ya DJ. 

 

“Sebetša seo go thwego se šomišitšwe go direng bosenyi bjo se thopilwe gomme ga e sa le go tloga fao se kgokagantšwe le dipolao tše dingwe,” Mathe o boletše. 

 

O okeditše ka gore bagononelwa ka moka ba bane ba kgolegong ya maphodisa gomme go letetšwe gore ba tšwelele kgorong ya tsheko kgauswinyana. 

 

Mokhomišenare wa Maphodisa wa Bosetšhaba Mojenerale Fannie Masemola o re ye ke kgatelopele ye bohlokwa yeo ka kholofelo e tla fago malapa ao a amegago dikarabo.

 

 “Re dirile gabotse go dihlopha tšeo di bego di kopanya bohlatse go tloga ka Ngwatobošego 2022. Ye ke sehlohlolong sa go šoma ka thata le boineelo go toka. Ye ke ye nngwe ya melato yeo e raraganego yeo dihlopha tša rena di bego di hloka go tšea nako ya tšona go netefatša gore go dirwe dinyakišišo tše di tseneletšego gore mafelelong re kgone go tliša molato wo o tiilego pele ga kgorotsheko”, a realo Gen Fannie Masemola. 

 

Gare ga ditatofatšo tšeo bagononelwa ba mengwaga ya magareng ga 45 le 60 ba lebanego le tšona di akaretša polao le go loga maanomabe a go bolaya.