Mootledi o swerwe morago ga go hwetšwa ka lefola la boleng bja go feta R90 000 leo le sego molaong
Monna wa mengwaga ye 27 o swere ka morago ga gore maphodisa a thibe sefatanaga seo se bego se rwele lefola leo le sego molaong la go feta boleng bja R90 000 kgauswi le Dalmada ka ntle ga Polokwane ka Mošupologo, 1 Lewedi.
Go ya ka maphodisa a Limpopo, go šetšwe morago tshedimošo ya mahlale mabapi le sefatanaga seo se bego se e tšwa Beitbridge se tliša lefola leo ka profenseng.
Mmoleledi wa maphodisa a Limpopo, Colonel Malesela Ledwaba o re maphodisa a beile sefatanaga seo leihlo tseleng ya N1 gomme ba se bona.
“Ge ba leka go emiša sefatanaga seo sa Hyundai ix35, mootledi o ile a leka go tšhaba ka lebelo la godimo mme maphodisa a mo kitimiša. Sefatanaga seo se ile sa emišwa tseleng ya R71 kgauswi le Dalmada,” a realo.
Ledwaba o re ge ba hlahloba sefatanaga, ba hweditše dithini tše 15 tša mafola a mohuta wa Remington Gold. “Mootledi yo e lego moagi wa Afrika Borwa o ile a swarwa mme o tla lebagana le melato ya go gweba ka lefola le go otlela bošaedi,” a realo.
Sefatanaga seo se tla tšewa ke mmušo go ya ka molao wa thibelo ya bosenyi bjo bo rulagantšwego.
Mokhomišinare wa maphodisa a profense, Lieutenant-General Thembi Hadebe o retile sehlopha ka go ba le hlokomelo le sebete sa go lwantšhana le bosenyi ka gare le ka ntle ga mellwane ya Limpopo.
