Batšofe ba šomiša bohlale bja tsebo ya mehlare go dira letseno

Ka Mogale Sekwela

Batšofe ba Itshomeleng Multipurpose Club ba šomišitše tsebo ya bona ya mehlare go dira sehlare sa go thuša go lwantšhana le go thibana ga dinko le go tloša mabadi.

 

Ka go šomiša dihlare tšeo, batšofe ba tšweleditše sehlare seo motseng wa Sebayeng ka ntle ga Polokwane, Limpopo.

 

Molaodi wa Itshomeleng, Jinnifer Mokgalapa o re sehlare seo se thuša go tloša dipudi (ringworms) le mabadi. “O kgona le go se tlola sefahlego gore se be boleta,” a realo.

 

O re sehlare seo se dira mehlolo. “Ge ngwana a tshwenya ke go thibana dinko, o mo tlotša dinko le mokgahlo ga mahlo. Dinko di ile go bulega metsotsong yeo e sa fetšego pelo. O se tlotša gape godimo ga dipudi le mabadi, mme ge nako e sepela le tšona di ile go tloga,” a realo.

 

O re nepo ya bona ke go thuša bao ba palelwago ke goya mabenkeleng ka ge dihlare di tura gore ba hwetše thušo ya kgauswi. “Ke ka lebaka leo re rekišago sehlare se ka tšhelete ya fase gore badudi ba kgone go se reka. Re se rekiša go thoma ka R25 go fihla go R50,” a realo.

 

Mokgalapa o re ba thomile go dira sehlare se mengwaga ye lesome ya go feta gomme ba se rekišetša badudi.

 

“Re tšeya nako go dira sehlare se. Re hlakanya dihlare tša go fapana mmogo, ra di bidiša ka phišo ya fase iri tše tharo re šomiša poto ya tšhipi.

 

“Ka morago re tlogela meetse ao gore a fole go fihla a e ba magareng ga go kgahla pele re a lokela ka gare ga dithekgwana. Ga se fapane le zam-buk. Tumo ya rena ke gore sehlare se se rekišwe mabenkeleng kgoparara naga ka bophara,” a realo.

 

O re ba bjala yemengwe ya mehlare yeo ba e šomišago go dira sehlare se lefelong la bona. “Sehlare se se re thuša go kgoboketša tšhelete yeo re e šomišago go rekela batšofe ba rena dijo,” a realo.

 

Itšhomeleng Multipurpose Club e na le batšofe ba 63, mme wa go ba feta ka moka o na le mengwaga ye 101.