Moetapele wa EFF Julius Malema o na le matšatši a 30 go kgopela tshwarelo ka polelo ya gagwe ya lehloyo

Kgorotsheko ya tekatekano ya Kapa Bodikela yeo e hweditšego moetapele wa EFF Julius Malema molato wa polelo ya lehloyo e mo laetše gore a kgopele tshwarelo mo matšatšing a 30.

 Kgorotsheko e laetše gape gore kgopelo ya tshwarelo yeo e phatlalatšwe polelong ya boraditaba le diforamo tša gagwe tša semmušo tša ditaba tša leago.

Molato wa polelo ya lehloyo ya Malema yeo e tšwago go ditshwayotshwayo tšeo di dirilwego moletlong wa EFF ka 2022 moo a ilego a ipiletša gore go latelwe monna yo mošweu yo a bonwego ka bidio nakong ya boipelaetšo bja Sekolo se Segolo sa Brackenfell ka Ngwatobošego 2020.

 “Botša monna yola yo mošweu gore a ntshekiše.Ke tla tla makga a mantši mo Kapa Bodikela, ke tšwelela molatong wa kgorotsheko. Ka gore ga go monna yo mošweu yo a tlago go mpetha gomme ke ipitša mofetogedi letšatšing le le latelago.”

Molato wo o tlišitšwe ke Lekgotla la Ditokelo tša Botho la Afrika Borwa le le lengwe gomme Malema o hweditšwe a na le maikemišetšo a go hlohleletša dikgaruru le go godiša lehloyo.

Mekgatlo ye mebedi e ile ya ngongorega ka dipolelo tšeo Malema a di boletšego nakong ya polelo. 

Polelong ya ka morago ga kahlolo, EFF e itše: “Re lemoga kahlolo ya Kgorotsheko bjalo ka tlhaselo ya sebaka sa temokrasi le tokelo ya go hlagiša dipolotiki tša phetogo. Polelo ya phetogo e ka se hlwekišwe go homotša maikutlo a bao ba tšwelago pele go thabela dienywa tša go amogwa ga naga ya bokoloniale gomme ba se ba ke ba itemogela dikgaruru tša semorafe le ge e le dife. Bošoro bja nnete ke nnete ya letšatši le letšatši ya go hloka naga, tlhokego ya mešomo,  le kgethollo ya semorafe yeo bathobaso ba e kgotlelelago.”