Moletlo wa go beya Kgošigatšana Masalanabo Modjadji VII semmušo bjalo ka Kgošigadi ya setšhaba sa Balobedu o emišitšwe
Moletlo wa go beya Kgošigatšana Masalanabo Modjadji VII semmušo o emišitšwe ka lebaka la ntwa kgorongtsheko mabapi le bogoši bjo.
Kgošigadi Masalanabo o ile a amogelwa semmušo ke Presidente Cyril Ramaphosa bjalo ka moetapele wa bogoši bja Modjadji ka di 13 Manthole 2024.
Le ge go le bjalo, kamogelo yeo e ile ya ganwa ke mogolo wa Masalanabo, Kgošana Lekukela Modjadji, yo a ilego a iša taba ye kgorongtsheko.
Se se dirile gore moletlo wa go beya Masalanabo bjalo ka kgošigadi ya setšhaba sa Balobedu wo o be o rulagantšwe go direga ka kgwedi ya Lewedi ngwaga wo o emišwe.
Sephetho se se latela diphetho tše pedi tša kgorotsheko tšeo di letetšwego e le go kgopelo ya thibelo yeo e thomilwego ke Kgošana Lekukela kgahlanong le Ngk. Mathole Motshekga le Kgošigatšana Masalanabo, le kgopelo ya tekolo ya go thibela sephetho sa Presidente Ramaphosa sa go lemoga Masalanabo bjalo ka kgošigadi ya nnete ya Balobedu.
Le ge go le bjalo, mmušo wa Afrika Borwa o phatlaladitše gore o ka se tšeye karolo go lefa goba go rulaganya moletlo woo ka lebaka la ditshepedišo tša kgorotsheko tšeo di tšwelago pele.
Lekgotla la bogoši bja Balobedu, le le thekgago Masalanabo le emišitše moletlo wa go mmeya semmušo.
“Re holofela gore Kgošigadi Masalanabo a tla bewa semmušo pele ga ba lapa la gagwe, gomme dilo ka moka di rarollwe ka khutšo,” gwa realo Gabriel Rasebotsa wa lekgotla la bogoši bja Balobedu, lehlakoreng la Masalanabo.
