Dithunya tšeo di šomišitšwego go bolaya DJ Sumbody di kgokagantšwe le dipolao tše 10
Dithunya tšeo di šomišitšwego polaong ya DJ ya go tuma Oupa John Sefoka, yo a tsebjago bjalo ka DJ Sumbody, di kgokagantšwe le melato ye mengwe ya maemo a godimo.
Se se utolotšwe ka Labobedi ke mmoleledi wa maphodisa a bosetšhaba Brigadier Athlenda Mathe ka ntle ga kgorotsheko ya bomaseterata ya Alexandra moo banna ba bane ba latofatšwago ka polao Sumbody ba bego ba tšweletšego.
Rakgwebo wa Sandton ka Gauteng Katiso “KT” Molefe, Musa Kekana, Tiego Floyd Mabusela le monyakišiši wa peleng wa maphodisa Michael Pule Tau, ba swerwe ka Mošupologo ke maloko a sehlopha tšhomo sa dipolao tša dipolotiki le bahlohlomiši ba bosenyi bjo bo rulagantšwego ba Gauteng go tšwa go Tirelo ya Maphodisa ya Afrika Borwa.
Go dumelwa gore Molefe o laetše gore go go bolawe Sumbody, mola basekišwa mmogo ba gagwe ba bararo go thwe ba phethagaditše polao yeo.
Sumbody o thuntšhitšwe a ke ka gare ga koloi ya gagwe ka Woodmead, Gauteng, ka la 20 Ngwatobošego 2022.
Baleti ba gagwe ba babedi, Sandile Myeza le Sibusiso Mokoena le bona ba ile ba bolawalefelong la tiragalo.
Molefe, Kekana, Tau, le Mabusela le bona ba amega polaong ya moentšeneare wa Vereeniging Armand Swart, yo a thuntšhitšwego makga a 23 ka ntle ga lefelo la gagwe la mošomo ka la 17 Moranang 2024.
Mathe o rile Kekana, Tau, le Mabusela ba swerwe ka lona letšatši leo Swart a bolailwego ka lona.
Dithunya tše nne, dipistola tše tharo le AK-47 e tee di thopilwe ke maphodisa ka morago ga polao ya Swart.
“Dithunya tšeo di be di le maphodiseng go tloga ka nako yeo. Di ile tša išwa go dirwa diteko tša ballistics,” a realo.
Mathe o hlalositše gore ge sehlopha sa mošomo sa dipolao tša dipolotiki se tsenela dinyakišišo ka Dibatsela 2024, tikologo ya bobedi ya diteko tša ballistics e netefaditše gore dithunya tšeo di šomišitšwe polaong ya Sumbody, gomme seo sa feleletša ka go swarwa ga Molefe.
“Mo nakong ye, dithunya tšeo ka moka tše nne, go akaretša le e tee ya AK-47, di kgokagantšwe le bonyenyane melato e 10 ya maemo a godimo yeo e akaretšago polao gotee le maiteko a polao, eupša re ka se boledišane ka melato yeo go fihla ga bjale,” Mathe a realo.
Bagononelwa ba lebane le ditatofatšo tša polao, go loga maanomabe a go bolaya, go swara sethunya seo se se nago laesense, le go swara dithunya tšeo di sego molaong mabapi le lehu la Sumbody.
