Bagononelwa ba tšwelela pele ga kgorotsheko ka morago ga go hwetšwa ba swere diphoofolo tša naga tšeo di hwilego

Maphodisa a swere bagononelwa ba bararo ba mengwaga ya magareng ga 29 le 38 ka morago ga go hwetšwa ba swere diphoofolo tša naga motseng wa Mbaula ka ntle ga Giyani ka Laboraro, 27 Phato.

Go begwa gore maphodisa a hweditše tshedimošo ka bagononelwa bao ba gwebago ka diphoofolo motseng wo. Ba ile ba šala morago tshedimošo yeo, mme seo sa feleletša ka go swarwa ga bagononelwa.

Mmoleledi wa maphodisa a Limpopo, Colonel Malesela Ledwaba o re bagononelwa ba hweditšwe mafelong ao a fapafapanego motseng wo. “Nakong ya go swarwa ga bona, maphodisa a hweditše letlalo la kwena le lenong leo le hwilego,” a realo.

Ledwaba o re bagononelwa ba ile ba iša maphodisa lefelong la kgauswi le noka moo ba hweditšego kwena ye e hwilego mme e sena letlalo.

“Bagononelwa bao ba tla tšwelela pele ga Kgorotsheko ya Giyani ka Labohlano, 29 Phato ba lebagane le molato wa go swara diphoofolo tša naga. Dinyakišišo tša maphodisa di tšwela pele,” a realo.