Moagi wa Zimbabwe le moAfrika Borwa ba swerwe ka lebaka la go sepetša disekerete tšeo di sego molaong 

Batho ba babedi, e lego moAfrika Borwa wa mengwaga ye 31 le moagi wa Zimbabwe wa mengwaga ye 28 yo a lego ka nagenh ka tsela yeo e sego molaong, ba rulaganyeditšwe go tšwelela kgorong ya tsheko ya mmaseterata wa Polokwane ka la Boraro la 27 Phato 2025 ka lebaka la go tsenela kgwebo ya disekerete tšeo di sego molaong le go tshela Molao wa Bofaladi.

Bjalo ka ge go begilwe ke mmoleledi wa Maphodisa wa Limpopo Colonel Malesela Ledwaba, go swarwa ga batho bao e bile ditlamorago tša tshepedišo yeo e laolwago ke bohlale yeo e dirilwego ke Sehlopha sa go Latela Limpopo, Yuniti ya Tsenogare ya Profense (PIU), le Tshimollo Security and Investigation.

Ka la 26 Phato, Toyota Corolla ya silifera yeo e bego e sepetša dithoto tšeo di sego molaong go tšwa Beitbridge go ya Polokwane e ile ya emišwa ka N1 North kgauswi le Mall of the North morago ga go ketimišwa ke maphodisa ka lebelo le legolo.

Maphodisa a hweditše mapokisi a 47 a disekerete tša Remington Gold, tšeo di akanyetšwago go ba le boleng bja go lekana R120,000, gomme sefatanaga se se tla thopša ka fase ga Molao wa Thibelo ya Bosenyi bjo bo Rulagantšwego.

Mokhomišenare wa Maphodisa wa Limpopo Molefotenente General Thembi Hadebe o retile tshepedišo ya tirišano bjalo ka phihlelelo ye e lemogegago.