Ditatofatšo kgahlanong le yo mongwe wa balatofatšwafa molatong wa polao ya polasa ya dikolobe di tšholotšwe  

Ditatofatšo tša polao kgahlanong le mookamedi wa polasa wa mengwaga ye masomepedi Rodulph De Wet di fedišitšwe kgorongkgolo ya tsheko ya Polokwane ka Labone.

Se se tla morago ga gore De Wet a dumele go ba hlatse ya mmušo ka dipolaong tša polasa ya dikolobe tša 2024 tša Maria Makgato le Lucia Ndlovu.

De Wet e be e le yo mongwe wa batho ba bararo bao ba latofaditšwego ka go thuntšha basadi bao go fihla a bolaya, bao go begwago ba be ba nyaka dijo tšeo di fetilwego ke nako polaseng kgauswi le Onverwacht, Limpopo.

 Ditopo tša bona di be di lahlwa ka gare ga lešaka la dikolobe go fediša bohlatse.  De Wet o bolela gore o ile a gapeletšwa le gore mong wa polasa, Zachariah Johannes Olivier wa mengwaga ye 60 ke yena a ilego a goga sethunya.  Mogononelwa wa boraro, William Musora (50) , moagi wa Zimbabwe, le yena o lebane le ditatofatšo.

 Mmušo o lahlile ditatofatšo kgahlanong le De Wet, o tsopola tirišano ya gagwe, yeo go letetšwego gore e tla tiiša molato wa batšhotšhisi kgahlanong le Olivier le Musora.

 Olivier le Musora ba lebane le ditatofatšo tšeo di akaretšago polao, maiteko a polao, go swara dithunya ka tsela yeo e sego molaong le go šitiša toka.  Musora o latofatswa ka tlaleletšo ka go tshela melao ya bofaladi.

Tsheko e beakantšwe go thoma ka la 17 Diphalane 2025.