Dintwa tša maloko a ANC dileteng tša Limpopo di tšwela pele go gola ka morago ga dikopano  

Ka Mogale Mohale

Dintwa tša maloko a mokgatlo wa African National Congress (ANC) dileteng tša Limpopo di tšwela pele go golela godimo.

 

Se se tla ka morago ga dikopano tša go kgetha baetapele ba Sekhukhune, Vhembe, Norman Mashabane le Peter Mokaba tšeo di fetilego.

 

Ba bangwe ba maloko ba ipelaeditše kgorong tša tsheko ka boetapele bjo bo kgethilwego, ba bangwe ba ngwalela gape kantoro ya mongwaledipharephare, Fikile Mbalula gore a tsenelele ka nepo ya gore dikopano tše di thongwe ka leswa.

 

Lekgotla komiti la ANC Limpopo le re le lemogile kgopelo kgorong ya tsheko kgahlanong le dipoelo tša kopano ya Sekhukhune mme ba ile go ganana le kgopelo yeo.

 

Mongwaledi, Reuben Madadzhe o re mabapi le dikopano tša Vhembe, Peter Mokaba le Norman Mashabane, ba lemogile mangwalo go tšwa go baromi ba bona.

 

O re ba ile go romela mangwalo ao go sehlophatšhomo sa ANC go sekwasekwa.

 

“Lekgotlakomiti le ikemišeditše go šomišana le boetapele bja naga go tiiša seriti le bootee bja mokgatlo. Re hlohleletša makala ka moka go šomišana le boetapele bjo bo kgethilwego ka se sebaka,” a realo.

 

Madadzhe o re ba hweditše lenanego la kopano ya selete sa Waterberg yeo e ya go go dula go thoma ka Labohlano, 18 go fihla ka Sontaga, 20 Mosegamanye.

 

“Re ipeletša go makala ka moka a Waterberg go netefatša gore dikopano tša ditokišo di swarwa go ya le ka molaotheo wa ANC le ditshepedišo tša kopano,” gwa realo Madadzhe.

 

Modulasetulo, Chupu Mathabatha o laeditše bohlokwa bja botee le tsosološo ya mokgatlo seemong se sa mokgatlo.

 

Mathabatha o gopoditše gape maloko gore ANC e tšeya maatla a yona go maitshwaro, bootee le maikemišetšo a boetaele bja go šomišana mmogo.

 

“Re kgala bao ba tšwago tseleng mme ba hlola diphapano tšeo di tlošago mokgatlo go tšwa tseleg ya bohwa bja yona, kudu ka ge re tšwela pele ka ditokišo tša dikgetho tša selegae gammogo le ditshepedišo tša ANC tša ka gare,” a realo.