Sergeant Nyiko William Lelaka ke o mongwe wa ba senyane bao ba hlokofetšego nakong ya ge sefatanaga sa maphodisa se thulana le theraka

Maphodisa a phatlaladitše leina la lephodisa leo le hlokofetšego kotsing ya sefatanaga yeo e bolailego batho ba senyane go akaretša le bagolegwa.

Sergeant Nyiko William Lelaka (41) o hlokofetše ge a be a le mošomong ka Labone, 14 Phato, nakong ya ge sefatanaga sa maphodisa seo a bego a se otlela se thulana le theraka tseleng ya R101 magareng ga Mokopane le Mookgophong.

Dinyakišišo tša mathomo di laetša gore sefatanaga sa maphodisa seo se bego se sepetša bagolegwa ba 11, go akaretša le mosadi o tee go tloga setišing sa maphodisa sa Mokopane go ya kgorong ya tsheko ya Naboomspruit se ile sa thulana le theraka dikhilomitara tše mmalwa pele go fihla Mookgophong.

Kotsi ye e dirile gore Lelaka le bagolegwa ba seswai ba lahlegelwe ke maphelo a bona.

Lelaka o be a šetše a na le mengwaga ye 20 e le lephodisa ka ge a thomile go šoma ka 2005. O ithutile tša sephodisa Pretoria Academy gomme ka morago a išwa setišing sa Roedtan seleteng sa Sekhukhune.

O be a šoma setišing sa Mookgophong nakong ya ge a tla hlokofala mme o tla bolokwa Mokgophong seleteng sa Waterberg ka Mokibelo, 23 Phato.