Moago wa dipapadi o tla reelwa leina la lešole leo le bolailwego ntweng ka DRC

Ka Mogale Mohale

Lapa la lešole leo le bolailwego ntweng, Calvin Moagi le thabile ka ge a ka se lebalwe.

 

Se se tla ka morago ga gore masepala wa Maruleng o tšeye sephetho sa go bitša moago wa dipapadi wo o agwago ka leina la Calvin Louis Moagi Sports Complex motseng wa Ga-Sekororo ka ntle ga Tzaneen, Limpopo moo a belegetšwego gona.

 

Ye ke go hlompha lešole la Afrika Borwa (SANDF) Calvin Louis Moagi yo a hlokofetšego a na le mengwaga ye 29.

 

Moagi ke o mongwe wa mašole a senyane ao a lahlegetšwego ke maphelo a bona nakong ya dikgohlano le marabele a M23 nageng ya Democratic Republic of Congo ka kgwedi ya Pherekgong 2025.

 

Nakong ya poloko ya gagwe ka gwedi ya Dibokwane, ba lapa ba kgopetše masepala gore o bitše o mongwe wa meago ka leina la gagwe gore a se lebalwe.

 

Malome wa gagwe, Stephen Moagi o re ba thabile ebile ba ikgantšha. “E be e le motho wa batho gomme o hwetše naga ya gagwe. Ka go bitša moago wo ka leina la gagwe, mediro ya gagwe e tla dula e gopolwa,” a realo.

 

O re ba lapa gammogo le setšhaba ba amogetše ditaba tše ka lethabo. O re ba sa goga boima go amogela lehu la gagwe. “Efela go tla loka ge nako e sepela. Dipelo tša rena di be di robegile eupša re tla fola,” a realo.

 

Meyara wa masepala wa Maruleng, Tshepo Musolwa o re sephetho sa go fetola moago woo se thekgilwe ke ba lapa la ga Moagi le lekgotla la masepala ka morago ga ditherišano tša setšhaba ka nepo ya go leboga le go boloka bohwa bja yo a lwetšego naga ka boikgafo.

 

 

“Go fetola ga leina re hlompha boikgafo bja Moagi le go netefatša gore bao ba tlago ba gopola maitapišo a gagwe go maeteko a go tliša khutšo nageng,” a reralo.

 

Moago wo o ile go akaretša dikarolo tša dipapadi tša fapafapana.