Hawks e phuruphuditše  diofisi tša mmasepala wa Polokwane morago ga ditatofatšo tša bomenetša

Di Hawks ka Limpopo e netefaditše gore e phuruphuditše ofising ya molaodi wa masepala wa Polokwane Thuso Nemugumoni ka Laboraro mesong.

 

 Ye ke karolo ya dinyakišišo tša bomenetša tšeo di akaretšago bahlankedi ba bagolo ba masepala.

 

 Ka polelo, Hawks e boletše gore tshepedišo ye e dirilwe ka morago ga taelo ya kgorotsheko yeo e ntšhitšwego ke kgorotsheko ya godimo ya Polokwane.

 

 Mmoleledi wa Hawks Colonel Katlego Mogale ore Kgorokgolo ya tsheko e ba file tumelelo ya go hwetša tshedimošo le ditokomane tša go thekga dinyakišišo tša bosenyi ka ga mahlabisadihlong ao go thwego a bomenetša ao a akaretšago dihlogo tša masepala le bahlankedi ba ona.

 

“DPCI e dula e ikgafile go dira ka maatla le ka gare ga molao go netefatša boikarabelo le go ba pepeneneng ka ditirong tša masepala,” Mogale a realo.

 

 Dinyakišišo tše di tla morago ga ditatofatšo tše šoro tša bomenetša le go se laolege ke ramotse John Mpe le molaodi wa masepala Thuso Nemugumoni bao go thwego ba hotšwe ke diranta tše dimilione ka go aba dithendara ka mmasepaleng.

 

Mmoleledi wa mmasepala Thipa Selala ore ditokomane di dirilwe gore di hwetšagale go ba Hawks.  “Bjalo ka mmasepala re dutše re gatelela gore neng le neng ge go na le ditaba re dirišana le ditheo tša phethagatšo ya molao ge di na le mangwalo a maleba goba a maleba a go bolela gore di nyaka ditokomane re tla ikhola gomme ra dirišana eupša re ka se tsene ka botlalo go ya ka seo ba se nyakago eupša re dirile gore ditokomane tšeo di hwetšagale,” Selala o boletše.