Mosadi o swerwe morago ga gore lesea le hwetšwe sethokgweng

Ka Mogale Mohale

 

Badudi ba Ga-Sekgopo ka ntle ga Modjadjiskloof, Limpopo ba ile ba šala ba tšhogile ka morago ga gore lesea le hwetšwe le lahlilwe sethokgweng.

 

Lesea leo le hweditšwe ke modiši yo a le hweditšego sethokgweng motseng ka Labobedi.

 

Lesea leo le hweditšwe le sana le placenta mme le tatilwe ka plastic.

 

Badudi bao ba kwelego bohloko ba kgadile ka bogale mekgwa ya go lahla masea, ka nako yeo go na go le basadi bao ba palelwago ke go belega.

 

Ba ipileditše go maphodisa go golega mmago lesea le mme a otlwe ka go tsena kgolegong nako ye telele.

 

“Ga gona mosadi wa go tšeya gabotse yo a ka lahlago ngwana wa gagwe ka tsela ye. Go bile mahlatse gore le hwetšwe le phela ka gore nkabe le hlasetšwe ke diphoofolo,” gwa realo Modjadji Modiba (43).

 

Badudi ba ipeletša gore mmago lesea le otlwe gore e be mohlala go bao ba nyakago go dira bjalo ka yena.

 

Mmoleledi wa maphodisa a Limpopo, Brigadier Hlulani Mashaba o re mogononelwa o ka fase ga hlokomelo ya maphodisa ka morago ga go gore badudi gammogo le maphodisa ba tsomana le yena.

 

“Mosadi yo o dirwa diteko go netefatša gore ke mmago lesea leo go ba aowa. Ge go ka hwetšwa gore ke mmago lesea, o ile go tswalelewa setišing sa maphodisa a Modjadjiskloof,” a realo.

 

O re lesea leo le belegwe ka Labobedi, 27 Mopitlo 2025, mme le lekolwa ke ba tša maphelo.