Tetelo Kgwedi o tšweletše pele ga kgoro ya tsheko ka lebaka la go belaelwa ka go rekiša mešomo ya maaka, dintlo le disetifikeiti matlakaleng a leago

Tetelo Kgwedi (33) o tšweletše pele ga kgoro ya tsheko ya Praktiseer kgauswi le Burgersfort, Limpopo ka Labone la di 17 Mosegamanye ka lebaka la go belaelwa ka go rekiša mešomo, dintlo le disetifikeiti tša maaka matlakaleng a leago.

Go bolelwa gore o be a bega mešomo ya maaka mo Facebook gomme a kgopela tefo go bao ba arabileng ka go romela ditlankana tša bona (CVs).

O swerwe ka Labobedi, 15 Mosegamanye ka morago ga go hwetša tshedimošo setšhabeng.

Dinyakišišo tša mathomo di bontšhitše gore Kgwedi o be a ikamiša e le mošomi wa maemo a godimo, go akaretša le bao ba šomago lefapheng la Human Resources, a šomiša maina a dikhamphane tšeo di tsebegago go akaretša le meepo.

Mmoleledi wa mapodisi a Limpopo, Colonel Malesela Ledwaba o re mogononelwa o be a ikamiša gape bjalo ka mošomi yo mogolo mo lefapheng la kgoro ya Limpopo, a rekiša dintlo tša RDP tša maaka.

“O be a rekiša gape le disetifikeiti tša maaka go batho bao ba nyakago mešomo ka thata,” a realo Ledwaba.

O re ba hweditše bohlatse bjo bo mo amantšhago le ditiro tše dingwe tša bomenetša nakong ya ge ba phuruphutša lapa la gagwe.

“A ka pharwa ka melato ya tlaleletšo ka ge dinyakišišo di tšwela pele. Setšhaba se kgopelwa go ya maphodiseng a kgauswi ge e ba ba radiilwe ke mogononelwa yo,” a realo.

Molato wa Kgwedi o šotišeditšwe go Labone, 24 Mosegamanye moo a tlago go dira kgopelo ya peili.

Mokhomišinare wa maphodisa a Limpopo Lieutenant-General Thembi Hadebe, o reta sehlopha ka modiro wa lebelo gomme a eletša setšhaba gore se dule se butše mahlo.

“Go swarwa ga gagwe ke kgato ye bohlokwa ya go fenya dihlopha tša bomenetša matlakaleng aleago, kudu bomenetša bjo bo hlaselago batho bao ba lego mathateng. Re kgopela setšhaba gore se dule se hlahloba nnete ya mešomo le ditirelo tša mmušo pele ba ntšha tšhelete,” a realo.