Tonakgolo Ngk Phophi Ramathuba o bitšitše kopano ya tšhoganetšo morago ga go oketšega ga dihlaselo tša tlaišo le dipolao tša basadi

Tonakgolo ya Limpopo, Ngk Phophi Ramathuba o bitšitše kopano ya tšhoganetšo ya koketšo ya lekgotlakomiti la gagwe go šetša ka pela go oketšega ga dihlaselo tša tlaišo le dipolao tša basadi le tšeo e ka bago dipolao tša bodumedi tša setšo kudu seleteng sa Vhembe go tloga mathomong a Phato.

Kopano ye e tla thoma ka Laboraro, 12 Phato ka 4pm go šogana le maano a tšhoganetso a go lwantšha bothata bjo, bjo bo šetšego bo bone dipolao tše di fetago lesome tša tlaišo ya basadi le dipolao ka gare ga matšatši a lesome fela.

Ramathuba o re tšedingwe tša dipolao di diregile ka morago ga gore Presidente Cyril Ramaphosa a fane ka molaetša wa tshepo nakong ya moletlo wa letšatši la Basadi kua Nkowankowa ka ntle ga Tzaneen ka Mokibelo, 9 Phato.

“Go na le selo seo se sa lokago mo profenseng ya rena, kudu seleteng sa Vhembe. Dipolao tše tša go tšhoša di ka se be tšeo di tlwaelegilego. Re lahlegile ka boitshwaro gomme go nyakega tsenelelo ya ka pela yeo e tiilego go emiša dipolao tše,” a realo. O re tšedingwe tša dipolao tše di ka ba di amana le dipolao tša setšo.

Ramathuba o gateletše gore katlego ya maano a go thibela dipolao tše a swanetše go akaretša banna e le balekane ba mafolofolo go fediša pefelo.

“Ge re sa tšee dikgato tše dikgolo ka Vhembe, re tla lahlegelwa ke monyetla wa go lwantšha kotsi ye ka katlego. Re swanetše go boledišana kudu le magoši, baetapele ba bodumedi, dingaka tša setšo le mekgatlo ya setšhaba gore re hwetše tharollo mmogo. Banna ba swanetše go emelela ba tšee kgato kgahlanong le bahlokofatši,” gwa realo Ramathuba.

Go lebeletšwe gore kopano ye e tla tšweletša dikgato tša ka pela go hwetša tharollo ya go lwantšhana le bothata bjo.