Mootledi o tšwelela pele ga kgorotsheko morago ga go hwetšwa a otlela a nwele madila kotsing yeo e bolailego morutwana mme ya gobatša ba bangwe
Monna wa mengwaga ye 31 o tšwelela pele ga kgorotsheko ya Groblersdal ka Labohlano, 22 Phato morago ga kotsi ye šoro yeo e bolailego morutwana wa mošemane wa mengwaga ye šupa gomme ya gobatša barutwana ba bangwe ba 14 tseleng ya R555 kgauswi le motse wa Marikana.
Kotsi ye e diragetše ka Laboraro mosegare, 22 Phato ge mootledi wa Toyota Avanza ye šweu a lahlegelwa ke taolo ya sefatanaga, gomme ya wa. Sefatanaga se be se nameditše barutwana ba sekolo sa Laerskool Roossenekal go boela magaeng a bona motseng wa Ngwaabe.
Ba tšhoganetšo ya pele ba hweditše mošemane yoo a šetše a hlokofetše lefelong la kotsi, mola banenyana ba lesome le bašemane ba bane ba kitimišeditšwe bookelong bja kgauswi go hwetša kalafo.
Mmolelei wa maphodisa a Limpopo, Brigadier Hlulani Mashaba o re dinyakišišo tša pele di bontšhitše gore mootledi o be a otlela a nwele madila ebile a nameditše bana ba go feta palo yeo e dumeletšwego.
“Mogononelwa yo o tla lebagana le ditatofatšo tša polao ntle le maikemišetšo, go otlela ka fase ga khuetšo ya madila, go otlela bošaedi le go nametša barutwana ka palo ye e feteletšego,” a realo.
Mokhomišinare wa maphodisa a profense, Lieutenant-General Thembi Hadebe o išitše mantšu a hlobošo go ba lapa leo le lehlegetšwego mme a lakaletša barutwana bao ba gobetšego pholo ya ka pela.
“Go nametša bana ke maikarabelo a magolo ao a nyakago hlokomelo le boikarabelo bjo bogolo. Re ka se dumele boitshwaro bjo bo sego molaong bjo bo beago maphelo a bana ba rena kotsing,” gwa realo Hadebe.
