Badudi ba Ga-Sekgopo ba tsenetše mogwanto ka morago ga go hloka meetse kgwedi tše tharo

Badudi ba Ga-Sekgopo ka ntle ga Modjadjiskloof ba tsenetše mogwanto ka Mošupologo, 1 Lewedi ka lebaka la go hloka meetse nakong ya go feta dikgwedi tše tharo.

Badudi ba ile ba tswalela tsela ye kgolo ya R81 ka ditšhila le matlakala go gapeletša Masepala wa selete sa Mopani go tšeya kgato.

Go ya ka badudi, bothata bo thomile ka kgwedi ya Phupu ge pompo ya go goga meetse e wela ka gare ga molete wa meetse, gomme seo sa tlogela malapa ao a fetago 500 a se na meetse.

Moetapele wa setšhaba Timothy Maluleke, o re badudi ba ikwa ba tlogetšwe. “Bothata ga se meetse, ke boetapele bjo bobe. Ga go motho yo a re tsebišago ka se se diregago. Batho ba a hlaka,” a realo, mme a oketša ka gore batšofe le bana ke bona bao ba amegago kudu ka bothata bjo.

Ka ntle le meetse, malapa a palelwa ke go apea, go hlatswa diaparo le go hlapa. Ba bangwe ba gapeletšega go reka meetse go bao ba epilego ka malapeng a bona mme ba lefa go fihla go R200 ka beke, mola ba bangwe ba swanelwa ke go sepela lebaka le le telele go yo tšea meetse mebotong ya kgauswi.

Mogwanto wo o bakile titelego ye kgolo ya sephethephethe tseleng ya R81, yeo e le go bohlokwa go kgokaganya mafelo a magaeng a Limpopo le ditoropo.

Mmoleledi wa masepala wa Mopani, Odas Ngobeni o ganne gore pompo ke yona e nago le bothata, a hlaloša gore: “Dikolomo di wele, gomme tharollo ke go epa molete o mongwe.” Le ge go le bjalo, o boletše gore ga go nako ye e beilwego ya gore ba tla epa neng.

Karabo ye e befedišitše badudi kudu, ka morago ga ge Meyara, Pule Shai a boletše beke ye e fetileng gore molete o lokišitšwe gomme badudi ba Ga-Sekgopo ba hwetša meetse, polelo yeo badudi ba e ganago.