Lebelela: EFF e buša gape wate 13, legaeng la Julius Malema

Economic Freedom Fighters (EFF) e atlegile go boloka boetapele bja wate 13 kua Seshego, kgauswi le Polokwane.

Le ke legae la motepale wa mokgatlo, Julius Malema.

EFF e fentše ANC, South African Communist Party (SACP), All Citizens Party (ACP) le Labour Party of South Africa.

Moemedi wa EFF, Mongatane Ramaphoko, o hweditše dikgetho tše 3 370 (57.34%). ANC e latetše ka Mokgadi Boloko yo a hweditšego tše 2 404 (40%), SACP ya hwetša 70 (1%), ACP tše 23 (0.39%) mme Labour Party ya hwetša 10 (0.17%).

Go batho ba 11 704 bao ba ngwadišitšwego, ke 5 877 feela bao ba kgethilego. Go bile le dikgetho tše 39 tšeo di senyedilego, ka fao bao ba kgethilego ke batho ba 5 916.

EFF e tšwela pele go laola wate 13, yeo ba e tšerego go ANC ka 2016.

Ramaphoko o tšea mošomo go tšwa go mokhanselara wa EFF wa Maloba, Mafiwa Leballo yo a rakilwego ke khansele ya Polokwane ka lebaka la go hloka go ba gona diphuthegong tše seswai ka tatelano.

EFF ka Limpopo e boletše gore phenyo ye e bontšha tshepo ya setšhaba mokgatlong. “Phenyo ye ke bohlatse bjo bo kwagalago bja tshepo yeo setšhaba se nago le yona mo go EFF go emela mathata a bona le go tliša diphetogo tša nnete,” ba realo.

Ka lehlakoreng le lengwe, mmoleledi wa ANC seleteng sa Peter Mokaba, Adolf Rapetswa o boletše gore ba thabišitšwe ke thekgo ye ba e hweditšego, kudu go Extension 127, 133 le 134.

“Se se bontšha gore baagi ba bantši ba ikemišeditše go bona ANC e buša ward ye,” a realo