Mosamaria o keteka letšatši la gagwe la matswalo le bao ba hlokago

Ka Mogale Mohale

Mosamariah wa kgaogelo, Mabilu Mokwalakwala ga a rate go amogela dimpho ke letšatši la gagwe la matswalo.

Efela o rata ge a abela barutwana bao ba hlokago diaparo tša sekolo, mengatwana ya lehlapo le diaparo.

 

O ketekile letšatši la gagwe la matswalo ka morago ga gore a sware mengwaga ye 59 le barutwana ba go feta 50 go tšwa dikolong tše 14 motseng wa Ga-Sekgopo ka ntle ga Modjadjiskloof, Limpopo ka Labohlano, 23 Mopitlo. O abetše barutwana bao diaparo tša sekolo, mengatwana ya lehlapo gammogo le go ja le bona khekhe ya gagwe.

O re o dira se ka ge a lemogile gore go na le barutwana bao ba ya go dikolong ntle le diaparo tša maleba, bjale o nyaka gore ba tšwele pele go ya dikolong ntle le go segwa ke barutwana ka bona.

 

“Ke ile ka ba gare ga seemo sa go hloka diaparo tša sekolo, ka fao ga ke rate go bona barutwana ba sepela tsela yeo ke e sepetšego ka gore e bohloko,” a realo.

 

O re ga a rate go bona barutwana ba hlaka, mola a na le maatla a go ba thuša.

O re o na le mengwaga ya go feta 14 a keteka letšatši la gagwe le barutwana bao ba hlakago.

“Ke setšo sa lapa la ga Mokwalakwala go abela batho dimpho ge re keteka. Ke hlohleletša batho gore ba ntšhale morago ka go thuša bao ba hlakago. Le ge e le thušo ye nnyane, e tla kgwatha bophelo bja motho o mongwe,” a realo.

Motlogolo wa gagwe, Shabi Mokwalakwala o re ba thabile go keteka letšatši la matswalo a gagwe.

 

“O be a re hlokomela ge re gola, mme re leboga gore o sa tšwela pele go hlokomela batho ba bangwe. Re tshepa gore o tla tšwela pele go thuša batho,” a realo.

 

Morutwana Tshepiso Malatji (12) o re ba hweditše papa go Mokwalakwala. “O dula a tšeya matsapa go netefatša gore re ya sekolong ntle le go boifa go segwa. Re leboga tše di botse tšeo a re direlago tšona ka gore bontši bja batswadi ba rena ga ba šome,” a realo.

 

Leloko la lekgotlataolo la sekolo sa fase sa Kiletša, Motsatsi Ramaremo o re ba leboga maitapišo a Mokwalakwala a go hlokomela bao ba hlakago.

 

“Re hloka batho ba go swana le Mokwalakwala motseng wa rena,” a realo.