Mašole a mahlano le bafaladi ba Zimbabwe ba golegilwe morago ga go hwetšwa ba swere mafola ao a sego molaong
Mašole a mahlano a Afrika Borwa go akaretša le mosadi, mmogo le bafaladi ba Zimbabwe ba babedi bao ba hlokago mangwalo ba golegilwe morago ga go hwetšwa ba gweba ka mafola ao a se go molaong.
Bagononelwa ba ba lego magareng ga mengwaga ye 26 le 42 ba swerwe ka Labobedi, 16 Lewedi mollwaneng wa Beitbridge go la Musina.
Ba lebagane le ditatofatšo tša go akaretša boradia, go swara mafola ao a se go molaong, go thuntšha ka ntle le tumelelo, go thibela toka, go tshela melao ya bofaladi gammogo le go itira tše nkego ke mašole.
Go ya ka maphodisa, go golegwa ga bagononelwa ba go tšweletše ka morago ga tiragalo tseleng ya mathomo ya Malaladrift kua Artonvilla, kgauswi le Noka ya Limpopo, moo balatofatšwa ba thweng ba lekile go thibela bagwebi ba mafola ge ba be ba tsena Afrika Borwa.
Mmoleledi wa maphodisa a Limpopo, Brigadier Hlulani Mashaba o re go ile gwa ba le mothuntšhano ka nako yeo mme tiragalo yeo ya gapeletša bagwebi go tlogela mapokisi a 24 a mafola.
“Mapokisi a mangwe a tshela a ile a hwetšwa kampeng ya lebaka nyana ya mašole, gomme mašole ao a swarwa,” a realo.
Mashaba o re morago ga moo, go ile gwa phuruphutšwa dintlo tše mmalwa moo ba hweditšego bohlatse bjo bongwe. “Moagong wa Phase 12, maphodisa a hweditše dikolo tše 18 tša dithunya, dikolo tše tshela tša sethunya sa bogale sa 303 le diaparo tše pedi tša mašole,” a realo.
Bagononelwa ba babedi ba ile ba swarwa kua Matswale Extension 9 ka morago ga go hwetšwa ga dikolo tše tharo tša sethunya sa 9mm gammogo le diaparo tše dingwe tša mašole.
“Mogononelwa o mongwe o golegilwe go la Matswale Phase 9, a na le kolo e tee ya sethunya sa 9mm. Ba tšwelela pele ga Kgorotsheko ya Musina ka Labone, 18 Lewedi,” gwa realo Mashaba.
