Rakgwebo Katiso Molefe yo e lego molatofatšwa polaong ya DJ Sumbody o ganeditšwe ka peile

Rakgwebo Katiso “KT” Molefe yo go thwego ke yena a rerilego polao ya DJ Sumbody le balatofatšwa mmogo ka yena ba barato ba ganeditšwe ka peile ke kgorotsheko ya bomaseterata ya Alexandra ka Laboraro.

Mmaseterata Renier Boshoff a boletše gore Molefe o paletšwe ke go hlatsela maemo a kgethegilego ao a lokafatšago go lokollwa ga gagwe kgolegong.

Molefe o latofatšwa ka go laela polao ya DJ ya go tuma yeo leina la gagwe la nnete e lego Oupa Sefoka. 

Ka nako yeo a bego a golegwa mabapi le polao ya Sumbody, Molefe o be a le ka ntle ka peile ka molato wo mongwe wo o amanago le polao ya moentšeneare khamphaning yeo e lego Vereeniging.

Molefe, Michael Pule Tau, Tiego Floyd Mabusela le Musa Kekana ba latofaditšwa ka dipolao tša DJ Sumbody le baleti ba gagwe ba babedi, Sibusiso Mokoena le Sandile Myeza, ka la 20 Ngwatobošego 2022, ka Woodmead, Johannesburg.

Mmaseterata Boshoff o boletše gore go na le dikarolo tše mmalwa tše di tshwenyago e sego fela tšeo di kgokaganyago Molefe le bosenyi eupša gape le mabapi le sediko sa gagwe sa khuetšo le bokgoni. 

O boletše gape gore go bonagala molato wa mmušo kgahlanong le yena le molatofatšwa mmogo le yena o tiile kudu.

 “Ditatofatšo ke tša mohuta wo mogolo kudu gomme ruri di ka oketša kotsi ya go tšhaba. Kgopelo ya gagwe ya peile e ganwa ka fao,” a realo Boshoff.

Banna ba bane ba tla boela kgorong ya tsheko ka la 18 Lewedi.