Monna yo a swelego a le mošomong o nyaka hlatswadiatla

Ka Mogale Mohale

Bophelo bja Moses Ramoadi (40) bo šarakane.

 

Se se diregile ka morago ga gore a gobale a le mošomong nakong ya ge go tsošološwa tsela ya R81 motseng wa Ga-Sekgopo ka ntle ga Modjadjiskloof, Limpopo ka kgwedi ya Hlakola 2021.

 

O be a šomela khamphane ya Lonerock Construction mme sedirišwa seo a be go a se šomiša sa ntšha meetse a go fiša ao a mo fišitšego.

 

O re o swele dikgara, matsogo le maoto mme a dula ICU beke tše pedi.

 

“Maoto a ka a fela a hlohlona. Ka nako yenngwe ge ke hlapa a tšwa madi. Ke ya dukologa ge ke sepela, ka fao ga ke kgoni go sepela lebaka le letelele,” a realo.

 

Moses o re o dirile dikaro tše mmalwa. “Ke hlathilwe bjalo ka mogolofadi ka lebaka la dikgobadi tšeo ke di hweditšego. Mmele waka o kwa bohloko ge seemo sa leratadima se fetoga mme ga ke kgoni go šoma,” a realo.

 

O re kotsi ye e šulafaditše bophelo bja gagwe. “Bohloko bjo ke bo kwelego ga bo hlalošegi ebile ke ya itshola gore nkane ke ile mošomong ka letšatši leo ka gore ke gapeletšega go nwa dihlare go okobatša bohloko go re ke kgone go phela,” a realo.

 

O re o paletšwe ke go hwetša hlatswadiatla ka ge a gobetše a le mošomong. “Khamphane e lefetše dingaka gore ke kgone go kaonafala fela. Seo ga se sa lekana ka gore nkase tsoge ke šomile gape bophelo bjaka ka moka,” a realo.

 

O re o išwa godimo le fase ge a botšiša ka hlatswadiatla. “Ke hloka tšhelete yeo gore ke kgone go phela le go tšwela pele ke reka dihlare,” a realo.

Molaodi wa tša tšhireletšo yo a ke tsebešitšego ka leina la January khamphaneng ya Lonerock Construction o re ba ka se kgone go bolela tshedimošo ya batho bonolo.

 

“Go nyakega taelo go tšwa kgorong ya tsheko pele re ka ntšha tshedimošo. Ka ntle ga fao, le ka tšwela pele ka go ngwala,” a realo.

 

O ile a beya mogala fase ka morago go polelo yeo.