Badudi ba šetše nyanyeng ka morago ga gore dintlo tša bona di senyege ka lebaka la go thuthupa ga moepo

Ka Mogale Mohale

Badudi ba metse yeo e fapanego go la Burgersfort, Limpopo šaretšwe ka ge malapa a bona a senyegile.

Se se tla ka morago ga gore moepo wa Chromex kgauswi le Serafa, Madifahlane, Moroke, Ga-Mathule le Mosiphong go la Burgersfort o thothopiše maswika ka Labone, 3 Mosegamanye.

Seo se dirile gore go be le mororumo wa naga moo malapa a mmalwa a badudi a senyege. Dintlo tša bona di palegile mme mahlabišaphefo a thubegile.

Tiragalo ye e tlogetše badudi ba boifa. Go ya ka dipego, moepo o ngwadile lengwalo gore o ile go emiša ditshepedišo tša moepo ka moka.

Moepo o ile go ema ka ge dipoledišano magareng ga moepo le badudi di kgatlampana gore go be le kwano ya gore malapa ao a senyegilego a ile go lokišwa bjang.

Dinyakišišo di ile go dirwa go lekola palo ya malapa ao a senyegilego.

Badudi ba befetšwe ka ge malapa a bona a senyegile kudu. “Ga re tsebe gore re ile go dira bjang. Moepo o swanetše go re lokišetša ka gore ga se phošo ya rena,” gwa realo modudi.

Ba bangwe ba badudi ba re ba boifa go robala ka malapeng a bona.

“Mahlabišaphefo a rena a thubegile ka fao re ile go robala kgakala. Re boifa gore mahodu a ka re tsenela a re utswetša le go re kata. Moepo o swanetše go re lokišetša ka pela pele go senyega,” gwa realo modudi (28).