Lesetja Kganyago o hlomilwe bjalo ka Mokhanselara wa bo 16 wa Yunibesithi ya Stellenbosch

Mmušiši wa Panka ya Resefe ya Afrika Borwa, Lesetja Kganyago o hlomilwe semmušo bjalo ka Mokhanselara wa bo 16 wa Yunibesithi ya Stellenbosch (SU) ka Labohlano morago ga go kgethwa ntle le phenkgišano ka Pherekgong.

 

Moletlo wo wa bohlokwa o ile wa swarwa Holong ya Endler ka Yunibesithi ya Stellenbosch.

 

Kganyago o hlatlama Moahlodi Edwin Cameron, yoo nako ya gagwe e fedilego ka Dibatsela 2024.

 

O belegetšwe Moletjie Ga-Maribana, ka la 7 Diphalane 1965, Kganyago e bile Mmušiši wa Panka ya Reserve go tloga ka 2014. 

 

Ge a amogela tema ya gagwe ye mpsha, Kganyago o ipileditše go Yunibesithi go amogela phetogo, a šupa dikgokagano tša histori tša setheo le kgethollo le go tsopola sereti Antjie Krog go tšweletša bohloko bja dintho tšeo di sa rarollwago.

 

 “A re ganeng kgethollo ya semorafe le go ganetša phetogo. Go fapafapana le go akaretšwa ga se feela dinyakwa tša boitshwaro, di bohlokwa bakeng sa go nyakišiša ka tlhaologanyo le toka.”

 

O okeditše ka gore o ikemišeditše 

go dira karolo ya gagwe ge go lebelelwa tema ye bohlokwa ya dihlongwa setšhabeng sa temokrasi. 

 

 “Go bohlokwa kudu gore re šireletše diyunibesithi tše kgahlanong le matšhošetši go tokologo ya thuto.”

 

 O itše: “Yunibesithi ye e swanetše go ba lebone la go rata go tseba le boetapele bja boitshwaro,” a gatelela go fapa-fapana le phetogo ya tša leago.”

 

Rector le Motlatšamokhanselara, wa Yunibesithi Deresh Ramjugernath o amogetše Kganyago bjalo ka mokhanselara yo mofsa wa setheo.

 

 “Mmušiši Lesetja Kganyago ke setsebi sa tša boiphedišo seo se hlompšhago kudu, modiri wa melawana le mohlankedi wa setšhaba. Bjalo ka mmušiši wa Panka ya Resefe ya SA, o bontšhitše sebete se se kgethegilego, bohlale le go se fetoge go sepelasepela dinakong tša go se kgonthišege ga ekonomi.”