Morwedi wa Jacob Zuma o tlogetše Kgoši Mswati III

Morwedi wa Mopresidente wa peleng Jacob Zuma, Nomcebo Zuma go begwa a tlogetše lenyalo la gagwe go Kgoši Mswati III, wa Eswatini.

 

 Go ya ka dipego tša Swaziland News, Nomcebo (22) yo e lego mosadi wa bo 16 wa Kgoši, o tlogetše lenyalo la gagwe ka morago ga gore a fetše dikgwedi a sa bone monna wa gagwe.

 

Nomcebo o nyetše Kgoši Mswati ka Lewedi 2024 nakong ya moletlo wa setšo wa Eswatini wa go bitšwa Umhlanga Reed Dance.

 

 

Kgatišo ye ya ditaba e boletše gape gore go tšwa ga Nomcebo ntlong ya bogoši go hlohleleditše kemedi ya bogoši bja Eswatini go ya legaeng la gabo ka Nkandla, KwaZulu-Natal, go rerišana ka go boela ga gagwe.

 

Go fihla ga bjale, lapa la Zuma goba mošate wa bogoši wa Eswatini ga se ba ntšha polelo ya semmušo.

 

Ka 2004, basadi ba babedi ba Kgoši ba ile ba mo tlogela.

 

Mathomong, go sepetše Putsoana Hwala. Hwala o ile a tšhaba Eswatini a tlogela bana ba gagwe ba bararo. Go begwa gore o ile a iphihla kua Alexandra moo lapa la gagwe le lego gona. 

Ka wona ngwaga woo, mosadi wa bohlano wa Mswati, Inkhosikati LaMagwaza go thwe o be a ratana le monna wa Afrika Borwa.  O ile a tšhabela London mmogo le bana ba gagwe.

 

Ka 2012, go begilwe gore yo mongwe wa basadi ba Mswati Angela “LaGija” Dlamini o mo tlogetše gomme a tla Afrika Borwa. 

 

Mosadi yo mongwe, Nothando Dube yo gape a tsebjago bjalo ka Inkhosikati LaDube o ile a rakwa ka lapeng la bogoši ka 2010 gomme ka morago a tlošwa semmušo ka 2011 morago ga gore a ratane le tona ya toka ya nako yeo, Ndumiso Mamba. Go begwa gore o ile a golegwa ka ntlong gomme a thibelwa go bona bana ba gagwe. 

 

Ka 2018, mosadi wa gagwe wa bo seswai Senteni Masango, o hlokofetše ka morago ga go ipolaya.