MEC Rachoene o re o tla fediša bohodu, go thopšwa le go senywa ga meago ya mmušo

Ka Mogale Mohale

Molekgotlaphethiši wa kgoro ya Mešomo ya Setšhaba, Ditsela le Dikgerekgere, Ernest Rachoene o ikemišeditše go fetša ka mahodu a go thopa le go senya meago ya mmušo.

 

Ka lesolo la #Vhuisa Thundo ya Muvhuso, Rachoene o re meago ka moka ya mmušo yeo thopilwego go ba go senywa e ile go boela go kgoro.

 

O re seemo sa meago yeo e senntšwego le yoe e hlanogetšwego go la Nebo, seleteng sa Sekhukhune e ile go šetšwa.

 

“Lesolo la rena la #Vhuisa Thundo ya Muvhuso le ile go nyakišiša dintlo tšeo di senntšwego le tšeo di thopilwego, gore mmušo o hwetše seo e le go wa wona morago. Kgoro e ile go šetša meago yeo e hlanogetšwego lefelong leo,” arealo.

 

Ge meago yeo e boetše go kgoro, e ile go tsosološwa gomme ya šomišwa mererong ya yona.

 

“Ke tsenetše lenanego la go lekola kabo ya ditirelo go la Nebo, le go lekola seemo sa dikantoro tša rena gammogo le go hlohleletša bašomi gore ba tšwele pele go šomela setšhaba ka thata,” a realo.

 

Rachoene o re o boledišane le bašomi go kwišiša dihlotlo tšeo ba kopanago le tšona mošomong.

 

Badudi ba amogetše lesolo la gagwe ka ge bontši bja meago ya mmušo e šomišwa go dira bosenyi. Ba re ba boifa go feta kgauswi le meago ye bošego ka ge go le kotsi.

 

“Ye mengwe ya meago ye e šomišwa ke makgoba a diokobatši mme e mengwe e šomiša ke mahodu go fihla tšeo ba di utswitšego pele ba ka di rekiša.

 

“Basadi ba tšeiwa ka kgang mme ba katelwa ka gare ga meago ye, ka fao kgoro e swanetše go šoma ka lebelo go lokiša meago ye gore e šome gape,” gwa realo modudi (41).

Ba ipeletša go mmušo gore o dumelele bo rakgwebo go šomiša meago ye, ntle le gore ba e tlogele e senywe.