Baetapele ba setšo ba Limpopo ba latofatšwa ka bomenetša bja go rekiša naga

Ka Moyahabo Mabeba

Baetapele ba mmalwa ba setšo ka Limpopo ba latofatšwa ka go rekišetša batho bao ba hlokago naga ditsha ka tsela yeo e sego molaong.

Go thwe bomenetša bjo, bo atile kudu metseng magaeng eo e welago ka tlase ga mmasepala wa selegae wa Lepelle Nkumpi moo dikgošana le dintona tša makgotla a setšo a Mphahlele, Maja le Ledwaba go thwego di hlalefetša badudi ka tšhelete ya bona.

Go ya ka methopo ye e ka botwago, baetapele ba setšo bao ba gobogilego le baemedi ba bona ba be ba tla rekišetša batho ba bahlano seripa se tee sa naga ka magareng ga R6000 go ya go R10,000, ba tlogela bareki ba lwa ka bo bona e be ba nyamelela moyeng o mosesane.

Thekišo ya naga yeo e sego molaong ga e sa le go tloga fao e ile ya swana mo nageng ya masepala, gomme mmasepala o šetše o phušotše tše dingwe tša dibopego tšeo di agilwego mo nageng ya wona.

Mmoleledi wa lekgotla la setšo la Mphahlele Bakgaga, Marothi Mphahlele o tiišeditše mokgwa wo o sego molaong, a tšwetša pele gore bjalo ka ntlo ya bogoši ba kgopišwa ke mahlabiša.dihlong a a bomenetša.

 

“Bjalo ka lekgotla la setšo la Bakgaga, re itšeela kgole le bomenetša bjo.

Re nyamile kudu gore dihlotlolo tše di amoga batho bao ba hlokago naga tšhelete ya bona yeo ba e šometšego ka boima gomme ditšhelete ga di fihle ntlong ya bogoši,” a realo.

“Re tsebišwa gape gore ba bangwe ba batho ba bao ba ipolelago gore ke dikgošana, ba amega gape go disetifikeiti tša boetapele bja setšo tša bofora tša go hwetša naga gomme ka fao ba bolela gore naga yeo ba e rekiša ka tsela yeo e sego molaong e le ya bona.

Re na le mengwaga re butše melato ya bosenyi le maphodisa eupša ga go na bao ba swerwego go fihlela ga bjale. Go a belaetša gore ke ka lebaka la eng maphodisa a diega go šomana le melato ye,” a realo Mphahlele.

Le ge e le gore ditšhelete tše ga di lefelwe ka dihlongwa tša ditšhelete, Mphahlele o boletše gore dinyakišišo tša boramolao ba bona di utollotše gore barekisi ba naga bao ba sego molaong ba ka be ba tšweleditše tšhelete ya go feta R17 milione ga e sa le bomenetša bjo bo thoma ka 2020.

Yo mongwe wa batšwa sehlabelo ba thekišo ya naga ya bofora, Albert Tema, o boletše gore o rekišitšwe naga yeo e sego molaong yeo e lego ya mmasepala, gomme ka morago ga go aga lefelo la kgwebo, mmasepala o ile wa phuhlaganya moago ntle le go mo fa tsebišo ya pele.

“Ke rekile ditsha tše hlano go batho bao ba bego ba ipolela gore ke baemedi go tšwa go bolaodi bja morafe wa Mphahlele.

“Ke be ke itlhobogile go hwetša naga ye gomme ke be ke se na pelaelo ya go di dumela.

“Mo nageng yeo, ke ile ka aga lebenkele le legolo le diphapoši tše pedi mola ke sa rulaganyetša go katološa. Setsha se be se ageleditšwe ka legora ka botlalo ka ge ke be ke na le pono ya go thoma kgwebo yeo e nago le poelo ye ntši.

“Ke tšere kadimo ya R69 000 go thekga theko ka ditšhelete ya naga ye, bakeng sa kgwebo le go lefela thuto ya bana ba ka ka ge ba be ba sa swanelegele sekema sa bosetšhaba sa thušo ya ditšhelete,” Tema o boletše.

Modulasetulo wa Tshwaranang Magoshi, Phauwe Mphahlele, o netefaditše gore setheo sa bona se tseba ka thekišo ya naga yeo e sego molaong tikologong yeo.

Phauwe o boletše gore gape ke mohlaselwa wa bomenetša bjo morago ga go reka naga magareng ga Lebowakgomo le Ga-Ledwaba.

“Ke rekile stand, gomme dibeke tše tharo ka morago, ge ke eya moo, ke ile ka hwetša batho bao ke sa ba tsebego ba lokišetša motheo wa go aga ntlo mo nageng ya ka.

“Ke ile ka tšweletša bohlatse bja tefo bja gore ke nna mong wa naga ye e swanetšego, gomme le bona ba tšweleditše bohlatse bja bona bja tefo” a realo.