Badudi ba Polokwane ba ile go lefa tshelete e ntšhi go fihlelela ditirelo tše bohlokwa
Ka Mogale Mohale
Badudi ba galefetše masepala wa Polokwane ka ge ba ile go thoma go tsenelela ka gare ga meraba ya bona go lefa ditirelo.
Se ke ka ge masepala o tšwetše pele go oketša tefo ya ditirelo mme seo se ile go thoma ka Labobedi, 1 Mosegamanye.
Mmoleledi wa masepala, Thipa Selala o re mohlagase o ile go hlahlošwa ka 11.32% go ya ka melao ya NERSA.
“Meetse a ile go hlahlošwa magareng ga 10.2% le 11.2% go ya le ka tšomišo mme ditirelo tšedingwe go swana le go tlošwa ga matlakala le kelelatšhila di ile go hlahlošwa ka 6%,” a realo.
Selala o re dihlahlošo tše di ya hlokega gore ba kgone go tšwela pele ba aba ditirelo. “Meyara John Mpe o gateletše gore masepala o ile go tšwela pele o šetša seemo sa ditšhelete ka tshepedišo ya dikoketšo tša Eskom le Lepelle Northern Water mme ba ka se oketše go feta baabi ba bona,” a realo.
O re 6 kiloliters ya meetse a mahala, mohlagase wa 100kWh wa mahala gammogo le thekgo ya 100% ya go tlošwa ga ditlakaladi di ile go abelwa malapa a go hlaka.
“Dikgopelo tša diphokoletšo di ka dirwa kantorong tša Civic Centre gammogo le di kantorong tšedingwe setšhabeng. Gore o kgone go hwetša diphokoletšo, letseno la ka gae ga le a swanela go feta R5 740 ka kgwedi,” a realo.
Dihlahlošo tše di tla ka morago ga gore badudi ba kgopele masepala go gopodišiša dihlahlošo tše nakong ya kopano ya setšhaba go la Seshego ka kgwedi ya Moranang.
Ba re hlahlošo tše di ile go ba gwahlafatša ka ge ba hlaka go phela mme bontši bja badudi ba sa šome.
“Seemo se se ile go gapeletša ba bangwe ba badudi gore ba dire tšeo di se go molaong go hwetša mohlagase le meetse a mahala. Re ile go bolawa ke tlala ka gore megolo ya rena e ile go felela ditefong tše tša ditirelo. Wo ga se ngwaga wa go phela ka fase ga masepala wa Polokwane,” gwa realo Mokgadi Shai (45).
Motšofe, Annah Malete (71) o re le ge a hwetša diphokoletšo, bontši bja mphiwafela wa gagwe bo ile go ya ditefong tša ditirelo.
