Barutwana ba 14 sekolong sa godimo sa Mahuntsi bao go gononwago gore ba jele dijo tša go ba le mpholo ba sale bookelong mola ba 31 ba lokollotšwe

Barutwana ba 31 go tšwa go ba 45 sekolong sa godimo sa Mahuntsi ka ntle ga Malamulele ba lokollotšwe bookelong ka morago ga dikgonono tša gore ba jele dijo tšeo di nago le mpholo.

Barutwana ba ile ba amogelwa bookelong bja Malamulele ka Labobedi, 2 Lewedi ka morago ga go hlatša le go kwa bohloko ka mpeng. Ba be ba laetša dika tša go ja mpholo.

Mmoleledi wa kgoro ya Thuto ka Limpopo, Mosebjane Kgaffe o re barutwana ba 14 ba sa le ka fase ga hlokomelo ya dingaka. “Go begwa gore ba maemong a kaone mme ba letelwa go lokollwa nakong yeo e sa fetšego pelo,” a realo.

Molekgotlaphethiši wa kgoro, Mavhungu Lerule-Ramakhanya o lakaleditše barutwana bao ba šetšego bookelong gore ba fole ka pela mme a reta ka moo bašomi ba tša maphelo, bolaodi bja sekolo le bašomi ba selete ka lebelo leo ba šomilego ka lona.

O re dinyakišišo tša go hwetša seo se hlotšego kotsi ye di gare di ya kgatlampana. “Bašomi ba maphelo seleteng sa Vhembe ba šetše ba thomile go lekola meetse a sekolo le dijo,” a realo.

Lerule-Ramakhanya o re bašomi ba gare ba etela malapa a barekiši bao ba ngwadišitšwego mme ba rekiša ka ntle ga sekolo  go lekola meetse le dijo tšeo ba di rekišetšago barutwana.

“Kgoro e letetše ditšhišinyo tša mafelelo go tšwa go balaodi ba tša maphelo, tšeo di tlago laetša dikgato tše di swanetšego go tšewa go netefatša tšhireletšo ya dijo dikolong,” a realo.