Buti Manamela o ikanne bjalo ka Tona ye mphsa ya thuto ya godimo

Tona ye mpsha ya thuto ya godimo, Buti Manamela, o ikanne moletlong wa semmušo ka Motse Kapa ka Labobedi.

Manamela yo a tšwago Phagameng ka Modimolle o tšere legato la Nobuhle Nkabane, yo a ilego a rakwa ke Mopresidente Cyril Ramaphosa maemong ao ka Mošupologo bošego.

Manamela o kile a šoma bjalo ka motlatšatona wa yona kgoro yeo.

Ka polelo ka Mošupologo, Kantoro ya Mopresidente e boletše gore go thwalwa ga Manamela go latela sephetho sa Mopresidente Ramaphosa sa go tloša Ngaka Nobuhle Nkabane mošomong wa gagwe wa Botona.

 

Ofisi ya Mopresidente ga se bja fa lebaka la go tlošwa ga Nkabane.

Go rakwa ga Nkabane go tlile letšatši pele ga he a be a tla tšwelela pele ga komiti ya thuto ya godimo ya Palamente go hlaloša tshepedišo ya go thwala ga boto ya Bolaodi bja Thuto le Tlhahlo ya Lekala (SETA).

Nkabane o ikhweditše a le mathateng morago ga go latofatšwa ka bomenetša le go thwala ga boto ya Seta yeo e sego molaong, go akaretšwa ditatofatšo tša gore o arošitše Palamente ka go fa tshedimošo ya maaka ka ga tshepedišo ya go thwala badulasetulo ba Seta.

Tonakgolo ya peleng ya KwaZulu-Natal,  Dr. Nomusa Dube-Ncube o ile a kgethwa bjalo ka motlatšatona wa Manamela.

Dube-Ncube o alogile ka Doctorate of Administration go tšwa Yunibesithing ya KwaZulu-Natal ka Motsheganong. 

O ikanne bjalo ka motlatšatona wa thuto ya godimo gotee le Manamela ka Labobedi ke Moahlodi mopresidente wa Kapa Bodikela Nolwazi Mabindla-Boqwana.