Lesolo la Phuza Weekend le golegile baotledi ba go feta 100 ba le ka fase ga khuetšo ya bjala kgwedi ye ya Lewedi mo Limpopo
Maphodisa a Limpopo a golegile baotledi ba 118 ka lebaka la go otlela ba le ka fase ga khuetšo ya bjala kgwedi ye ya Lewedi fela ka lesolo la Phuza Weekend.
Kgoro ya Dinamelwa le Tšhireletšo ya Setšhaba e re lesolo la bjale leo le diregilego go tloga ka Labohlano, 26 go fihla ka Sontaga, 28 Lewedi go golegilwe baotledi ba 35 ba le ka fase ga khuetšo ya bjala.
Bahlankedi ba boletše ka maemo a godimo a khuetšo ya bjala seleteng sa Mopani moo go hweditšwego palo ye kgolo ye e lekanago 1.17mg/1000ml.
Go golegilwe gape ba 4 seleteng sa Capricorn, 1 kua Mopani, 13 go la Vhembe le 17 kua Waterberg.
Molekgotlaphethiši wa kgoro, Violet Mathye o retile bahlankedi ba maphodisa ka mošomo wa bona gomme a lemoša baotledi ka kotsi ya go otlela ba nwele bjala.
“Go golegwa ga mongwe le mongwe ke kgato ye kgolo ya ditsela tše di bolokegilego. Go otlela o nwele bjala ga go molaong fela, ke botlaela ebile go kotsi. Malapa a mantši a senyega ka lebaka la kgetho e tee ya motho ya go nwa bjala a fetše a otlele,” a realo.
Mathye o kgopetše baotledi gore ba dire dithulaganyo tše dingwe ge ba e nwa, go swana le go kgetha mootledi yo a sa nwego bjala le go šomiša dinamelwa tša bohle.
“Lesolo la Phuza Weekend le tla tiišetšwa kudu ge nako ya sehla sa mafelelo a ngwaga e batamela, gomme baotledi bao ba hwetšwago ba nwele bjala ba tla lebelelana le molao ka botlalo,” gwa realo Mathye.
