BOMOTSWALA BA GA MORAMAGA BA BOLOKILWE LEHONO
Bomotswala ba babedi bao ba thuntšhitšwego le go bolawa ka Mamelodi ka Tshwane ba bolokilwe motseng wa Luckau ka ntle ga Groblersdal ka Seleteng sa Sekhukhune ka Mokibelo, 1 Dibatsela 2025.
Bobedi bjo, tshiamo le Baleseng Moramaga ba hweditšwe ka dintho tša go thunšhwa wa hlogong ka Sontaga mafelelong a beke ya go feta ka Mamelodi East Extension 17 ka Tshwane.
Ge a bolela polokong yeo, Molekgotlaphethitši wa tša Maphelo ka Limpopo Dieketseng Mashego o boletše gore tshepedišo ya toka e swanetše go tšea magato go fediša dikgaruru tša bong ka nageng.
Mashego o be a emetse Tonakgolo ya Limpopo Dr Phophi Ramathuba.
Gape bao ba bego ba le gona ke Meyara wa Elias Motsoaledi, David Tladi, le Chief Whip, Elias Ntuli.
Mashego o boletše gore mmušo wa profense o eme le lapa la Moramaga leo le nyamilego nakong ye e bohloko.
“Bjalo ka mmušo wa Profense, re kgalema mehuta ka moka ya dikgaruru tše di theilwego godimo ga bong le tšhomišompe ya bana gomme re ipiletša go botee le magato a setšhaba go šireletša basadi le bana” a realo.
Lapa la Moramaga le hlalositše bahu e le bao be ba phelago mmogo gomme ba tletšego ka ditoro.
Mmoleledi wa lapa Edward Moramaga ore ba sa nyamile kudu ka masetlapelo a.
“Ge re ekwa ka tiragalo ye, e tsošitše maikutlo ka maatla. Re na le bothata bja go robala bošego, gomme maikutlo a rena a godimo. E bohloko, ebile e bohloko le go feta ka gobane re botšwa gore e dirilwe ke motho o tee. Re ipotšiša gore a ka tšea maphelo a bona bjang,” Edward o boletše.
Mogononelwa, Themba Mnisi (38) yo go thwego e be e le lesogana la yo mongwe wa bomotswala ba o swerwe gomme a tšwelela pele ga kgorotsheko ya bomaseterata ya Mamelodi ka Laboraro.
O lebane le melato ye mebedi ya polao le ye nngwe ya maiteko a polao. O tlogetše kgopelo ya gagwe ya beili gomme o tla boela kgorong ya tsheko ka Pherekgong 2026.
