Kgoro ya Maphelo Kgoro ya Maphelo e kgala bao ba phatlalatšago gape dikgatišotša kgale tšeo di laetšago maemo a mafelo a maphelo

Ka Mogale Mohale

Kgoro ya Maphelo ka Limpopo e tshwenyegile morago ga go phatlalatšwa ga dikgatišo tša kgale tšeo di ntlafaditšwego mme di bontšhago maemo a mafelo a maphelo ao a fošagetšego.

Dikgatišo tše di phatlaladitšwe matlakaleng a dikgokaganyo go akaretša le Tik Tok. Go ya ka kgoro, dikgatišo tša kgale tša bookelo bja Nkhensani le Elim di phatlaladitšwe gape, mme di hlotše matšhwenyego ao a sa hlokegego le go fetola pono ya setšhaba.

Mmoleledi wa kgoro, Neil Shikwambana o re didirišwa tšeo tša go fošagala di nyenyefatša go šoma ka thata ga bašomi ba tša maphelo.

“Re hlohleletša setšhaba go netefatša tshedimošo pele ba e phatlalatša, kudu go matlakala a dikgokagano a sebjalebjale ao a sepedišanago bjalo ka TikTok,” a realo.

Shikwambana o re ba ikemišeditše go šoma ka boikgafo bja bona bjo bo le go pepeneneng le ntšhwafatšo ye e tšwelago pele ya ditirelo. “Re hlohleletša setšhaba go latela dikgokagano tša kgoro tša semmušo go hwetša tshedimošo yeo e nepagetšego,” a realo.

O re ba lemogile gore go phatlalatšwa ga tshedimošo ye e fošagetšego go senya seemo sa bašomi ba tša maphelo, ebile go ka senya gape tumelo ya setšhaba, ya dira gore balwetše ba nyame go hwetša thušo yeo ba e hlokago.

“Re kgopela setšhaba ka moka go šireletša ditirelo tša maphelo tša setšhaba ka go gana go abelana tshedimošo ye e fošagetšego le ye e makatšago,” gwa realo Shikwambana.