Badudi ba tšwela pele go hloka meetse ka ge projeke tša go ja tšhelete ya go feta R213 millione di pala go fela

Ka Mogale Mohale

Makgolokgolo a badudi a sokola go hwetša meetse.

 

Se ke ka ge diprojeke tšeo di thomilwego di pala go fela metse magaeng masepaleng wa Blouberg ka ntle ga Polokwane.

 

Masepala wa selete wa Capricorn o ile wa thoma projeke tše mmalwa ka tšhelete ya go feta R213 millione.

 

Projeke tšeo go akaretša ya Devrede, Grootpan, Sias, Longdon, Ramaswikana, Taaiboschgroet, Kromhoek, Milbank, Nailana, Pax le Brana.

 

Go fihla ga bjale, badudi ga ba hwetše meetse ka ge projeke tšedingwe di pala go fela. Letšatši le letšatši, badudi ba sokola go hwetša meetse a go hlweka mme ba gapeletšega go reka 210 litara ka R25. Bao ba hlokago tšhelete ba gapeletšega go sepela lebaka la go feta 2km go a hwetša.

 

“Meetse ao re a rekago a fela ka pela ka gore re a šomiša go apeya, go nwa, go hlapa le go hlatswa. Bontši bja tšhelete ya mphiwafela ya bana ba rena e šomišwa go reka meetse,” gwa realo Kedibone Maela (36).

 

Sylvia Mathebula (40) o rile: “Re gapeletšega go hwetša meetse a ditšhila sedibeng. Re beya maphelo a rena kotsing efela ga rena kgetho,”

 

Ga bjale ba nyaka gore projeke tšeo di fetšwe gore ba hwetše meetse.

 

Mokhanselara wa Democratic Alliance (DA) masepaleng wa Blouberg, Schoeman Kobola o re ba ipeletša go meyara Mamedupi Teffo gore a nyakišiše diprojeke tšeo di sa fetšwago.

 

“Bao ba paletšwego ke go dira mešomo ya bona ba swanetše go rwešwa maikarabelo,” a realo.

 

Mmoleledi wa masepala wa Capricorn, Jabu Masondo o re projeke tše mmalwa di maemong a go fapana ka mabaka a didirišwa, tšhelete le mathata ao a šitišago nako ya gore di fele.

 

“Tšwelelo ya projeke ya Devrede e ditetše ke dingangišano ka ge meetse a epilwe ka ntle ga lefelo leo le abetšwego ke ba mošate. Ya Kroemhoek e fedile efela karolo ya Ratau e itemogela mathata a hlaelelo ya meetse ka lebaka la mohlagase wo o loketšwego ntle le molao,” arealo.

 

O re projeke ya Brana e ditela ke mathata a sedirišwa sa go sepediša mohlagase seo se loketšwego nageng yeo e nago le mong.