Monna o tla tšwelela pele ga kgorotsheko ya Seshego molatong wa go kata mosetsana yo a be go a romilwe lebenkeleng la gagwe go kgopela dijo

Monna wa mengwaga ye 51 o letetšwe go tšwelela pele ga kgorotsheko ya Seshego molatong wa go kata mosetsana wa mengwaga ye 11.

Se se latela gore a golegwe molatong wa go belaelwa ka go kata mosetsana yo motseng wa Makgofe ka ntle ga Polokwane, Limpopo magareng ga ngwaga wa 2021 le 2023.

Go ya ka maphodisa, taba ye e begilwe la mathomo ka Hlakola 2024, eupša dinyakišišo di tsosološitšwe gape ka ge tshedimošo e mpšha e tšweletše.

Monna yo o golegilwe ka Laboraro, 6 Phato ka morago ga tshepetšo ya tshedimošo ye e nepišitšwego ke leloko la sehlopha sa bosenyi bja ka gae, tšhireletšo ya bana le melato ya thobalo kua Seshego.

Mmoleledi wa maphodisa a Limpopo, Colonel Malesela Ledwaba o re go bolelwa gore mosetsana yo, yo a bego a dula le rakgadi wa gagwe ka nako yeo, o be a romelwa gantši go ya lebenkeleng la  monna yo go kgopela dijo a sa swara tšhelete.

Ledwaba o re monna yo o ile a šomiša maemo ao go kata mosetsana yo pele a ka go mo fa dijo.

“Mosetsana o begile tlaišego yeo go rakgadi wa gagwe, eupša rakgadi o ile a e hlokomologa gomme a tšwela pele go mo romela go monna yo,” a realo.

Ka Pherekgong 2024, maloko a mangwe a lapa a ile a kwa ka tlaišego ye gomme ba e begela maphodisa ka kgwedi ya Hlakola.

“Molato o ile wa tswalelwa mathomong ka lebaka la go se be le bohlatse bjo bo lekanego, eupša ga bjale o butšwe gape ka ge go hweditšwe tshedimošo e mpsha,” a realo.

Ledwaba o tiišitše gore go ka ba le bagononelwa ba bangwe bao ba ka golegwago mme dinyakišišo di tšwela pele.