Matome Reuben Modiba yo a tšhabilego kgolegong o golegilwe gape

Ka Mogale Mohale

Mogolegwa, Matome Reuben Modiba (29) yo a tšhabilego kgolegong o golegilwe gape.

Se ke ka morago ga gore Modiba yo a be go a emetše tsheko a tšhabe kgolegong setišing sa Maake ka ntle ga Tzaneen, Limpopo ka Mošupologo, 30 Phupu nakong ya ge maphodisa a mo gapela ka kgolegong ka morago ga gore a pharwe ka molato.

O golegilwe gape motseng wa gabo go la Tickyline ka Labone, 3 Mosegamanye.

Go golegwa ga gagwe go tla ka morago ga gore maphodisa a hwetše tshedimošo mabapi le mogononelwa yo a be go a khutile lapeng la gagwe.

Mmoleledi wa maphodisa Brigadier Hlulani Mashaba o re maphodisa a ile a kitimela lefelong leo, ba mo hwetša mme ba mo golega.

“O ile a golegwa molatong wa go thuba ka lapeng, molato wo o begilwego ka kgwedi ya Moranang. Tšeo di diregilego nakong ya ge a tla tšaba di ya nyakišišwa,” a realo.

O ile go tšwelela pele ga kgoro ya tsheko ya Ritavi ka Labohlano,3 Mosegamanye a lebagane le molato wa go tšhaba kgolegong gammogo le wa go thuba ka lapeng.

“Dinyakišišo tša maphodisa di tšwela pele,” gwa realo Mashaba.