BOSA e keteka letšatši la Nelson Mandela ka go hlwekiša Sekgopo Kliniki

Build One South Africa (BOSA) Limpopo e ketekile letšatši la Nelson Mandela ka go neela metsotso ye 67 ya bona go dira tirelo ya setšhaba, ka go hlwekiša Sekgopo Kliniki motseng wa Ga-Sekgopo kgauswi le Modjadjiskloof.

Sehlopha seo se be se etilwe pele ke moetapele wa BOSA wa profense, Timothy Maluleke yo a bego a na le maloko a mangwe a mokgatlo ba hlwekiša lefelo leo la kalafo bjalo ka mokgwa wa go hlompha mogale wa lefase, Nelson Mandela.

Maluleke o boletše gore keteko ye e be e le “metsotso ye e swanetšego kudu” ya go gopotša motho yo a neetšego bophelo bja gagwe go khutšo le toka. “Re keteka mogale wa lefase, yo a lwantšhanego le kgatelelo ya bokgoba bja batho baso mo Afrika Borwa,” a realo.

O lebogile balaodi ba kliniki le setšhaba sa BOSA ka tshepo ye ba e bontšhitšego. “Re leboga setšhaba sa BOSA le balaodi ba kliniki ka go re tshepa ka lefelo la bona,” a oketša.

Ge a nagana ka bohwa bja Mandela, Maluleke o gateletše mathata ao setšhaba se itemogelago wona. “Re hlompha monna yo a lwantšhitšego kgatelelole bokgoba. Fela re sa dutše re lebeletšane le kgatelelo ka go hloka meetse, kgaotšo ya mohlagase le bomenetša,” a realo. Bjalo ka BOSA, re emela phethagatšo ya ditirelo mo motseng wa rena,” a realo.