Tsela ya R71 e tswaletšwe ka morago ga go thuthupa ga digase tšeo di be go di rwele ke theraka

Ka Mogale Mohale

Tsela ya R71, Magoebaskloof e tswaletšwe lebaka nyana.

Se ke ka morago ga gore theraka yeo e be go e rwele silindara tša gase e amege ka gare go kotsi mme e sware ke mollo.

Seo se dirile gore digase tšeo di thuthupe.

Mmoleledi wa kgoro ya Dinamelwa le Tšhireletšo ya Setšhaba, Matome Taueatsoala o re ba lemoša baotledi ka kotsi yeo ye šoro tseleng ya R71 kgauswi le Ruskamp.

Taueatsoala o re theraka yeo e thutši mme se sa hlola gore digase tšeo di thuthupe. Mehlare ya kgauswi e ile e jewa ke kgabo yeo ya mollo.

“Tsela ya R71 e tswaletšwe lebaka nyana mme ga gona sefatanaga seo se dumeletšwego. Bahlapetše ba tšhoganetšo ba šoma ka thata go laola seemo. Baotledi ba hlohleletšwa go šomša tsela ya R528 ya George’s Valley go ba ditsela tšedingwe,” a realo.

O re kgoro e hlohleletša baotledi ka moka go otlela ka šedi ka dinako ka moka le go etiša polokego pele.