Monna yo go thwego o bolaile kgarebe ya gagwe gomme a ikgantšha ka tiragalo ye go dikgokaganyo tša leago o swerwe
Monna wa mengwaga ye 26, Mfana Mfana Ngwenya, o golegilwe ke maphodisa a North West ka molato wa polao ya kgarebe ya gagwe ya peleng, Kgaugelo Marota, le go leka go bolaya kgarebe ya gagwe ya bjale.
Go swarwa go diregile ka iri ya mathomo ya la 22 Phato 2025, kua Carousel View, kgauswi le Maubane, Hammanskraal.
Mmoleledi wa maphodisa a North West Colonel Adéle Myburgh o boletše gore ka la 21 Phato 2025, Kgaugelo, wa mengwaga ye 20, o hweditšwe a hlokofetše ka thabeneng motseng wa Maubane, a na le dintho tše ntši tša go hlabja.
Ditirelo tša Phološo ya Tšhoganetšo le tša Kalafo di ile tša tsebatša gore o.hlokofetše lefelong la tiragalo.
Ka morago ga polao yeo, Ngwenya o ile a tšea bideo ya setopo sa Kgaugelo seo se tšholotšwego madi gomme a e bea go dikgokaganyo tša leago.
Ka morago o ile a phumola bidio yeo e bakilego kgalefo.
Myburgh o boletše gore Ngwenya o boile gae morago ga polao yeo gomme a hlasela kgarebe ya gagwe ya bjale, yeo ga bjale e robetšego sepetlele ebile e hwetša kalafo ya dikgobalo tša yona.
Ka morago ga ditiragalo tšeo, Ngwenya o ile a bea bidio go dikgokaganyo tša leago a hlaloša ditiro tša gagwe. O beakantšwe go tšwelela kgorong ya tsheko ya Bomaseterata ya Temba ka la 25 Phato 2025, a lebane le ditatofatšo tša polao le maitekelo a polao.
