Kamogelo Bakudi yo o a thopilwego ka Bloemfontein o hweditšwe a phela  

Kamogelo Bakudi yo a thopilwego ka Bloemfontein ka Free State mathomong a kgwedi ye o hweditšwe a phela.

 

Moithuti wa mengwaga ye 19 wa Mphato wa 11 go tšwa Sekolong sa Martie du Plessis o hweditšwe ka toropong ye nnyane ya Wepener gape ka Free State.  

 

Mmoleledi wa maphodisa a profense, Brigadier Motantsi Makhele ore moswa wa mahlalagading o hlakodišitšwe ka tshepedišo ya tlhakodišo ye e rulagantšwego. 

 

Bakudi o ile a thopša ka la 5 June 2025 ke banna ba babedi bao ba ilego ba itira maphodisa ge a be a otlelwa goya gae go tšwa sekolong kua Vereeniging Drive, Bloemfontein.

 

Makhele o boletše gore ka morago ga dibeke tša dinyakišišo tše di tseneletšego, Bakudi o hweditšwe a bolokegile gomme a phološwa ka masa a Labohlano, 27 June 2025. 

 

“Banna ba bahlano ba Maafrika ba mengwaga ya magareng ga 20 le 29 ba golegilwe. Bagononelwa ba bararo ba swerwe ka ntlong ka Kanana Location, Wepener, mola ba bangwe ba babedi ba swerwe tseleng ya magareng ga Kwetla Location le toropo ya Wepener — bana le motšwasehlabelo,” Makhele o boletše.

 

Se se tliša palomoka ya bao ba swerwego molatong wo go tshelela. 

 

Mogononelwa wa mathomo, e lego sajenene wa maphodisa wa mengwaga ye 42, yo a bego a swerwe peleng, o tšweletše kgorong ya tsheko a latofaditšwe ka go thopa le go tšea ka kgang.

 

Molefotenente General Baile Motswenyane, Mokhomišenare wa maphodisa ka Free State, o boletše gore go hlakodišwa ga Bakudi ka polokego ke kimollo ye kgolo go lapa la gagwe le setšhaba. 

 

 “Ke reta maloko a rena ka maitapišo a ona ao a sa šišinyegego, ao a šomilego ka go se lape go latela ketapele ye nngwe le ye nngwe ka fase ga tlhokomelo ye kgolo ya setšhaba. Re tla netefatša gore toka e a phethagatšwa.”

 

Bagononelwa ba lebane le ditatofatšo tšeo di amanago le go thopa, go tšea ka kgang.  Ba tla kopanela le sajenene wa maphodisa kgorong ya tsheko ka Mošupologo wa di 30 June 2025. Dinyakišišo di tšwela pele.