Mmoleledi wa ANC Limpopo o boifela bophelo bja gagwe

Ka Mogale Mohale

Mmoleledi wa ANC Limpopo Jimmy Machaka o dumela gore bophelo bja gagwe bo kotsing.

Se se tla ka morago ga gore a hwetše megala le melaetša ya matšhošetši a polao.

 

Ka morago ga moo, maotwana a sefatanaga sa gagwe a ile a hlabjwa ka thipa toropong ya Polokwane, Limpopo  bošegong bja Laboraro, 20 Mopitlo.

 

Machaka o re o fologile sefatanaga sa gagwe bjalo ka batho ba bangwe mme a tsena ka kopanong ya ANC ya babega ditaba. “Re ile go fetša ka kopano ka boela sefatanageng mme ka hwetša ba šomile ka sona. Ke hweditše maotwana a mararo a hlabilwe,” a realo.

 

O re o hweditše melaetša ya matšhošetši a polao mme o dumela gore ke batho bao ba le go kgahlanong le thekgo ya gagwe go boetapele bjo bo phenkgišanelago boetapele bja selete sa ANC Peter Mokaba. 

 

O dumela gore maotwana a hlabilwe ka maitekelo a go hlola kotsi ye šoro.

 

Se ke ka lebaka la gore o ka lehlakoreng la modulasetulo wa liki ya basadi ya ANC Limpopo ebile e le meyara wa masepala wa selete sa Capricorn, Mamedupi Teffo gammogo le modulasetulo wa maloba wa liki ya baswa ya ANC Limpopo ebile e le molekgotlaphethiši wa kgoro ya Mešomo ya Setšhaba, Ditsela le Dikgerekgere, Tony Rachoene.

 

Bo bedi bja bona ba phekgišanela maemo a bodulasetulo le letsogo la modulasetulo khonferenseng ya selete sa ANC Peter Mokaba yeo e kgatlampanago.

 

Machaka o hweditše matšhošetši ao gore bophelo bja gagwe bo kotsing go fihla a tlogela go thekga Teffo le Rachoene.

 

“Ge ba nyaka go mpolaya, ba swanetše ba fenye dikgopolo tša ka. Ke tšere sephetho sa go kgetha boetapele bjo boswa ka ge ke dumela go bona. Ba ka se mpolaye,” a realo. 

Go kwagala gore Machaka o na le khuetšo makaleng a selete sa Molemole le Polokwane. A ke makala ao a nago le dipalo tše ntši tša baemedi ba go kgetha khonferenseng.

“Ye ke polotiki ya go se re selo. Ke ile go thekga Teffo le Rachoene ka lebaka la maikemišetšo a bona a kabo ya ditirelo,” a realo.