Kgoro ya Dinamelwa le Polokego ya Setšhaba ka Limpopo e re e itokišeditše go laola kgolo ya sephethephethe ditseleng mafelelong a beke ye

Kgoro ya Dinamelwa le Polokego ya Setšhaba ka Limpopo e re e itokišitše go laola kgolo ya sephethephethe ditseleng ge makgolokgolo a badumedi a kgeregela profenseng go ya dikopanong tša dikereke tša go fapafapana go thoma ka Labohlano, 5 go fihla ka Sontaga, 7 Lewedi.

Go netefatša gore moela wa sephethephethe o thelela gabotse gammogo le polokego ya bašomiši ba tsela, bahlapetše ba sephethephethe ba ile go hlahloba ditsela tše dikgolo le makopano a ditsela a bohlokwa go akaretša N1, N11, R101, R81, R71, R579, R37, R36, R40, R528, R574, R516, R521, D4040, D19, R524 le R523.

Mmoleledi wa kgoro, Tidimalo Chuene o re bašomi ba molao ba tlo netefatša gore ga go na maitshwaro a go se be le maikarabelo bjalo ka go kitima ka lebelo le legolo, go nametša banamedi ba bantši, go otlela o nwele madila le go šomiša sefatanaga seo se sa lokelago tsela.

“Baotledi ba kgopelwa gape go tšeya maikarabelo a go netefatša gore difatanaga tša bona di loketše tsela, banamedi ba apara lepanta la polokego, ba efoge go otlela ba lapile le go šomiša sellathekeng ba otlela,” a realo.

Molekgotlaphethiši wa kgoro, Violet Mathye o rometše mantšu a borutho a go amogela baeng ka moka bao ba tlago profenseng.

“Ge re kopana mmogo ka dikopano tše bohlokwa bjale ka tše, ke kgopela bašomiši ba ditsela, e ka ba ba  ba etago go tšwa kgole goba badudi bao ba etelago mafelo a mangwe gona ka mo profenseng gore polokego e be godimo ga tšohle,” a realo.

Mathye o kgopetše baotledi go otlela ka hlokomelo le go se fele pelo. “Efogang go otlela le lapile, go kitima ka lebelo le legolo le go nametša batho ba go feta palo ka ge e le tšona tšeo di hlolago dikotsi kudu,” a realo.