Zion Christian Church e latola mosadi yo a ipitšago moporofeta wa kereke dikgokaganong tša leago yo a bolelago gore o romilwe ke moetapele wa kereke, Bishop Dr. B. E. Lekganyane

Kereke ya Zion Christian Church (ZCC) e ikgogela morago go mosadi yo a dirago dipolelo tša boporofeta mo matlakaleng a dikgokaganyo tša leago a apere sešupo sa kereke.

Mosadi yoo, yo a tsebjwago e le Nokuthula Skhosana o bonwe kgatišong a bolela gore ke yena moporofeta yo a romilwego ke moetapele wa kereke, Bishop Dr. B. E. Lekganyane.

Mmoleledi wa kereke, Moatshe o re Skhosana ga se leloko goba moemedi wa ZCC gomme molaetša wa gagwe ga o emele thuto, melao le dikgopolo tša semmušo tša kereke.

“ZCC ga e šomiše dikgokagnyo tša leago go phatlalatša melaetša ya yona goba dithuto tša yona,” gwa realo Ngoepe.

“Melaetša ka moka yeo e bolelago gore e tšwa kerekeng gomme e abja mo matlakaleng a dikgokaganyo e swanetše go lebelelwa bjalo ka ya maaka le ya go thetša.”

Kereke e hlohleletša maloko a yona le setšhaba ka bophara gore ba ikgokaganye feela le mekgwa ya yona ya semmušo ya dikgokaganyo, ya gatelela gore dipoledišano tša setšo ke tšona fela mekgwa ya semmušo ya go phatlalatša le tsebišo.

Polelo ye ya kereke e latela ka morago ga phapantšho ye e bakilwego ke diteng tšeo di phatlaladitšwego ke Skhosana mo matlakaleng a ikgoganyo, moo a bonalago a apere sešupo sa ZCC a dira dipolelo tša semoya.

ZCC yeo e lego e nngwe ya dikereke tše dikgolo kudu mo Borwa bja Afrika, e šetše e bontšhitše ka mehla gore ga e šomiši dikgokaganyo tša leago goba dipolelo tša boporofeta matlakaleng a leago, mme ya gatelela gore ditaba ka moka tša semmušo tša kereke di rulaganywa ka mekgwa ya yona ya ka gare ya semmušo.