MAPHODISA A MOHLALENG WA BAGONONELWA BAO BA BOLAILEGO MOOTLEDI WA BMW

Maphodisa a Jane Furse, Seleteng sa Sekhukhune a thomile go tsoma bagononelwa bao ba itlhamilego bao ba amegago tiragalong ya go thuntšha yeo e feleleditšego ka lehu la mootledi wa monna ka Mošupologo wa di 20 Diphalane 2025. 

Go ya ka mmoleledi wa maphodisa a Limpopo Colonel Malesela Ledwaba, motšwasehlabelo o be a otlela koloi ye tšhweu ya BMW M4 ge a lalela ke banna ba dithunya bao ba sa tsebjego ge a batamela dihump tša lebelo karolong ya Madibong. 

Mogwera wa gagwe, yo e bego e le monamedi, o kgonne go tšhaba a sa gobala ge mootledi a be a leka go tšhaba, mafelelong a thula mohlare le legora.

“Ge ba fihla lefelong la tiragalo, maphodisa a hweditše gore mohlaselwa o hweditše dintho tše ntši tša go thunywa ka godimo ga mmele wa gagwe, monamedi o phonyokgile a sa gobala.EMS e tsebagaditše gore mohlaselwa o hwile lefelong la bosenyi.Maikemišetšo a tiragalo ye ga a tsebje mo nakong ye,”Ledwaba o boletše.

Maphodisa a hlohleletša mang le mang yo a nago le tshedimošo ka ga tiragalo ye goba bagononelwa go ikgokaganya le Sajene Vusi Mohlala go 082 479 2828 goba go šomiša nomoro ya go emiša bosenyi goba MySAPSApp go bega.