Tonakgolo Ramathuba o tshepiša go raka malekgotlaphethiši a go tšwafa

Ka Mogale Mohale

Tonakgolo ya Limpopo, Ngk Phophi Ramathuba o kgadile ka bogale balekgotlaphethiši bao ba tšwafago go aba ditirelo.

 

O re ka lebaka la badudi ba Limpopo, a ka se lebelele morago go raka le go šotiša malekgotlaphethiši ao a sa abego ditirelo tšeo ba di tshepišago batho.

 

Ramathuba o be a bolela nakong ya poledišano ya morago ga tekanyetšo ya tša matlotlo go la Polokwane, Limpopo ka Labobedi, 3 Phupu.

 

O re se se botse ka yena ke gore ke motho ya a sa boifego go tuma ka tše botse go ba tše mpe ka ge a tlwaetše.

 

“Bjale ge nka go raka mošomong mme wa goketša batho gore ba ntumiše, ke ile go dumela ka gore le dira gore ke tume. Efela ka lebaka la badudi ba Limpopo, go ile go rakwa le go šotišwa ga bao ba palelwago ke go aba ditirelo,” a realo.

 

O re ba feditše ka poledišano ya setšhaba mabapi le lefelo la ekonomi la Fetakgomo-Tubatse, mme o nyaka go bona mošito o tšwela pele.

 

“Ke ya itlama gore mafelo a ekonomi a Fetakgomo-Tubatse le Musina-Makhado gore a ile go phethega ka nako pušo yaka efela ge seo se ka se direge, le ile go bala ditaba mabapi le bao ba rakilwego le go šotišwa,” a realo.

 

O re yenngwe ya hlobaboroko ke meetse, le ge e le gore go na le dimasepala tšeo di filwego maatla a go abela setšhaba meetse.

 

“Ge e le gore mošomo waka ke go aba meetse, ke swanetše ke fetše letšatši le bošego ke bolela ka meetse,” a realo.

 

Ramathuba o re ba nyaka baetapele bao ba tsebago gore ga ba tsebe. “Se ke ka lebaka la gore ge o tseba gore ga o tsebe, o ile go nyaka thušo go bao ba tsebago. Ka se, o tla kgona go aba ditirelo,” a realo.

 

O re badudi ba lapišitšwe ke go kwa dipolelo ebile ba fela pelo ya mešomo.